Яшчэ ў пачатку красавіка быў зьмешчаны ў сьледчы ізалятар былы дэпутат Андрэй Клімаў, якога абвінавацілі ў распаўсюджваньні праз інтэрнэт заклікаў супраць дзейнай улады. Тры месяцы пасьля арышту Клімава ягоныя сваякі час ад часу кантактавалі з журналістамі, але болей як месяц таму гэтыя кантакты спыніліся не па віне мэдыяў. І вось учора жонка палітыка Тацяна Клімава нарэшце паведаміла хаця б самыя кароткія зьвесткі па свайго мужа.“Ён жывы, канешне”.
“Нехта раней спрабаваў перадаць падушку, дык не прынялі”
Ужо амаль два тыдні ў берасьцейскім сьледчым ізалятары трымаюць лідэра маладзёвага руху Паўла Севярынца. Нагадаем, былога кіраўніка “Маладога фронту” арыштавалі на 15 дзён за ўдзел у несанкцыянаваным сходзе. Гэтак суд паставіўся да прэзэнтацыі кнігі Паўла Севярынца “Лісты зь лесу” ў сядзібе берасьцейскага БНФ.Маці актывіста Тацяна распавяла, што дамаглася для Паўла чарговай перадачы.
“Гэта ня першая была яму перадача, дагэтуль яму перадавалі ды з сабой харчоў далі. Адвезла яму падушку маленькую, бо там няма. Нехта раней спрабаваў перадаць падушку, дык не прынялі, а ў мяне ўзялі. Спальны мех у яго там ёсьць. Гэта добра, бо там стала холадна зараз, акрамя таго, там вільгаць вялікая. У камэры іх чатыры чалавекі. Гэтак мне распавядалі”.
Нагадаем, Павал Севярынец толькі ў траўні выйшаў з “хіміі”, якую адбываў у далёкай вёсцы Малое Сітна ў Полацкім раёне. Актывіст адбыў там болей за паўтара года і выйшаў на волю датэрмінова на 4 месяцы, але зноў апынуўся за кратамі. Аднадумцы Паўла жартуюць, што ўлада праз ізалятары хутка кампэнсуе тое, што не дасядзеў Севярынец ў Малым Сітне.
”Наша моц у нашай духоўнасьці”
Прыйшлі новыя зьвесткі пра Аляксандра Казуліна. Па-першае, зь ім бачыўся адвакат Зьміцер Гарачка. Аповед адваката пра сустрэчу, як заўсёды, быў стрыманы. Спадар Гарачка, аднак, адзначыў, што не заўважыў, каб здароўе Алякандра Казуліна хаця б крыху палепшала ў параўнаньні з тым, як было паўтара месяца таму.Другая крыніца – ліст дамоў, якія нядаўна атрымалі сваякі палітыка. Жонка Казуліна Ірына кажа, што муж напісаў пра вялікі попыт бібліятэкі, якую ён пачаў зьбіраць ў калёніі. Вось такую цытату з ліста мужа прапанавала нашым слухачам Ірына Казуліна:
“Я па-ранейшаму перакананы і веру, што шчырае і бескарысьлівае памкненьне дзеля агульнага дабра пракладуць сабе дарогу скрозь цемру і любыя перашкоды. Наша моц у духоўнасьці”.
Нагадаю, былога кандыдата на прэзыдэнта Аляксандра Казуліна абвінавацілі ў хуліганстве і арганізацыі вулічных беспарадкаў ды на 5,5 гадоў пазбавілі волі. Палітык і шмат хто ў Беларусі й сьвеце мяркуюць, што зь ім паквіталіся за апазыцыйную дзейнасьць.
У маладафронтаўцаў Артура Фінькевіча і Зьмітра Дашкевіча асаблівых навінаў няма. Пра гэта распавёў “хімік” Фінькевіч, які днямі атрымаў ад калегі Дашкевіча ліст са шклоўскай калёніі.
Чаму няма зьвестак пра Андрэя Клімава?, 18.08.2007 З Аляксандрам Казуліным ў калёніі сустрэліся дочкі Вольга і Юля, 14.07.2007
