Хроніка перасьледу 30 верасьня: бізнэсоўца з Калодзішчаў асудзілі на «хімію» за палітыку

Менскі гарадзкі суд прызнаў вінаватым у «садзейнічаньні экстрэмісцкай дзейнасьці» (ч. 1 і 2 артыкулу 361‑4 Крымінальнага кодэксу Беларусі) Дзяніса Гуляшова, які кіраваў групай кампаніяў продажу абсталяваньня для жывёлагадоўчых фэрмаў.

Згодна з інфармацыяй выданьня «Наша ніва», суд над бізнэсоўцам адбыўся нядаўна, яму прысудзілі хатнюю хімію.

Дзяніс Гуляшоў нарадзіўся ў 1987 годзе, жыў у Калодзішчах пад Менскам.

25 верасьня Міністэрства ўнутраных справаў Беларусі ўключыла Дзяніса Гуляшова ў сьпіс «асобаў, якія маюць дачыненьне да экстрэмісцкай дзейнасьці». У адпаведным пераліку на сайце ўстановы 6930 прозьвішчаў.

Палітзьняволенага Вадзіма Здаравеннава асудзілі па другой крымінальнай справе

50-гадовага палітвязьня Вадзіма Здаравеннава 29 верасьня асудзілі па новай крымінальнай справе і прызначылі 4 гады і 7 месяцаў калёніі, а таксама штраф 22 500 рублёў (500 базавых велічыняў).

Палітвязьня абвінавацілі ў «дзеяньнях, якія груба парушаюць грамадзкі парадак», «распальваньні варожасьці» і «незаконных дзеяньнях у дачыненьні да інфармацыі аб прыватным жыцьці і пэрсанальных зьвестак». Вядома, што справа тычыцца камэнтароў і фатаздымкаў, якія былі знойдзеныя пазьней у ягоным ноўтбуку.

Раней мужчыну асудзілі да двух гадоў калёніі за «абразу Лукашэнкі». Ён адбываў пакараньне ў шклоўскай калёніі № 17. Першы тэрмін палітвязьня мусіў скончыцца ў лістападзе гэтага году, піша «Вясна».

ГЛЯДЗІЦЕ ТАКСАМА:

37 краін АБСЭ заклікалі ўлады Беларусі вызваліць усіх палітвязьняў і спыніць рэпрэсіі

Чаму гэта важна

У Беларусі жорсткія рэпрэсіі пачаліся пасьля прэзыдэнцкіх выбараў 2020 году, калі па ўсёй краіне прайшлі масавыя акцыі пратэсту супраць фальсыфікацыі іх вынікаў. Пад палітычна матываваны перасьлед трапілі ўдзельнікі пратэстаў, цэлыя прафэсійныя групы і грамадзкія арганізацыі.

Згодна з дасьледаваньнем ініцыятывы BelPol, агульная колькасьць рэпрэсаваных у Беларусі з траўня 2020 году, калі пачалася прэзыдэнцкая выбарчая кампанія, па красавік 2026 году складае ня менш за 500 тысяч.

Праваабарончы цэнтар «Вясна» на 30 верасьня 2026 году прызнаў палітвязьнямі 879 незаконна асуджаных грамадзян, а праваабарончая ініцыятыва dissidentby — 934.

ГЛЯДЗІЦЕ ТАКСАМА:

Найгорш з мэдыцынай — у горадзенскай турме. На канфэрэнцыі ў Вільні прэзэнтавалі рэйтынг беларускіх вязьніц