Кіраўнік Міністэрства фінансаў Расеі Антон Сілуанаў прыбыў на саміт G20 і сустрэўся з міністрам фінансаў ЗША Скотам Бэсэнтам. Сустрэча адбылася на форуме G20 у Эшвіле, паведамляюць амэрыканскія мэдыя.
Як піша журналіст Fox Business, на сустрэчы Бэсэнт прасоўваў мірны плян прэзыдэнта Дональда Трампа для Ўкраіны з 28 пунктаў.
«Бэсэнт зноў акцэнтуе ўвагу на мірным пляне прэзыдэнта Трампа для Ўкраіны, яны таксама абмяркоўваюць эканамічны рост. Гэта адбываецца, калі Крэмль прымяншае значэньне перамоваў з Украінай», — паведаміў тэлеканал NBC.
Прадстаўнік амэрыканскага Міністэрства фінансаў пацьвердзіў тэлеканалу CNBC, што Бэсэнт і Сілуанаў абмяркоўвалі менавіта прэзыдэнцкі мірны плян.
Удзел Сілуанава ў саміце адразу ж выклікаў пратэст службоўцаў Эўразьвязу, піша The New York Times. Паводле зьвестак выданьня, віцэ-канцлер Нямеччыны Лярс Клінгбайль разам з калегамі зь іншых краін ЭЗ пагражалі байкатаваць традыцыйнае агульнае фота міністраў, калі ў кадры апынецца расейскі прадстаўнік. Мяркуючы з выніку, пагроза падзейнічала: ад удзелу ў фотасэсіі ўрэшце адмовіўся сам Сілуанаў, адзначае NYT.
Для расейскага міністра ўдзел у цяперашнім саміце — першы з 2022 году. Пра свой візыт у Эшвіл ён загадзя не аб’яўляў. Заходнія партнэры і раней падкрэсьлена ігнаравалі прадстаўніка Расеі на такіх форумах. Так, у 2022 годзе тагачасная кіраўніца Міністэрства фінансаў ЗША Джанэт Елен выйшла з залі сустрэчы G20 у рамках вясновай сэсіі МВФ, як толькі слова ўзяў Сілуанаў, які ўдзельнічаў празь відэасувязь. Праз год, ужо на саміце G20 у Індыі, яна наўпрост усклала на расейскіх фінансавых чыноўнікаў адказнасьць за ахвяры вайны ва Ўкраіне і шкоду для ўсясьветнай эканомікі.
Мірны плян Трампа
Мірны плян Дональда Трампа для Ўкраіне — комплексная ініцыятыва адміністрацыі ЗША, накіраваная на замарожваньне і спыненьне вайны, якую вядзе Расея супраць Украіны.
Плян распрацаваў спэцыяльны пасланьнік Трампа Стыў Уіткаф пры ўдзеле дзяржаўнага сакратара Марка Рубіё. Пачатковая вэрсія дакумэнту складалася з 28 пунктаў, яе прэзэнтавалі бакам у канцы 2025 году.
Сёньня рамкі пляну застаюцца прадметам жорсткіх дыпляматычных дыскусіяў і зьменаў, бо Кіеў і яго эўрапейскія хаўрусьнікі патрабуюць перагледзець шэраг пунктаў.
Расея фактычна ігнаруе міжнародныя заклікі замарозіць баявыя дзеяньні, спыніць вайну і пачаць перамовы. У Кіеве зазначаюць, што гатовыя да гэтага.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум