На беларускім дзяржаўнага радыё на працягу трох тыдняў не было трансьляцыі сьвятой імшы зь менскага архікатэдральнага касьцёлу, паведаміла выданьне katolik.life.
Раней такая трансьляцыя адбывалася кожную нядзелю ў 8.15.
Пра спыненьне трансьляцыі напісалі ў сацыяльных сетках вернікі напярэдадні нядзелі — паводле іх, трансьляцыі не было ўжо два тыдні. У нядзелю 12 ліпеня Імша зноў не прагучала ў радыйным этэры, замест яе грала клясычная музыка.
Аднак пазьней высьветлілася, што спынілася толькі рэтрансьляцыя імшы на канале «Культура» беларускага радыё, а на першым канале трансьляцыя засталася, піша katolik.life.
Белтэлерадыёкампанія пракамэнтавала
Белтэлерадыёкампанія выступіла з заявай, у якой назвала інфармацыю пра спыненьне трансьляцый сьвятой імшы на Беларускім радыё «сфабрыкаванай правакацыяй».
Паводле кампаніі, трансьляцыя нікуды не зьнікала, а крытыкі проста ня слухалі радыё ў Беларусі і зрабілі памылковыя высновы паводле сайта.
«Відавочна, што аўтары ўкіду ня маюць рэальнай магчымасьці слухаць радыёэфір на тэрыторыі Рэспублікі Беларусь, у сувязі з чым спасылаюцца ўсяго толькі на мэтаданыя з сайта Першага нацыянальнага канала Беларускага радыё, дзе трансьляцыя згадваецца як «тэматычная рубрыка», што зьяўляецца тэхнічным пазначэньнем прамога эфіру», — заявіла Белрадыёкампанія.
Прадстаўнікі кампаніі настойваюць, што праграма «Каталіцкая пропаведзь» выходзіла і выходзіць а 8:15 бязь зьмен.
Чаму гэта важна?
Многія каталіцкія вернікі састарэлага веку ня маюць магчымасьці рэгулярна бываць на Боскай літургіі, таму з дапамогай радыё далучаюцца да малітвы. Зь менскага архікатэдральнага і іншых касьцёлаў Беларусі вядзецца відэатрансьляцыя, але многія з тых людзей ня маюць выхаду да сеціва.
На Беларускім радыё службу трансьлююць апошнія пяць гадоў пасьля аднаўленьня перадачы ў 2021 годзе, калі да ўладаў і кіраўніцтва Белтэлерадыёкампаніі зьвярнуўся тагачасны Апостальскі адміністратар Менска-Магілёўскай архідыяцэзіі, біскуп Казімір Велікаселец.
Форум