Паводле зьвестак БУТБ, за студзень–травень 2026 году ўдзельнікі біржавых таргоў з Расеі заключылі ўгоды на агульную суму $498 млн. Гэта ажно на 29% больш, чым за аналягічны пэрыяд 2025 году.
Асабліва моцна біржавы тавараабарот павялічыўся ў сэгмэнце аграпрамысловага комплексу — з $289 млн да $401 млн, піша Myfin.
Доля сельскагаспадарчай прадукцыі ў агульным аб’ёме біржавога гандлю паміж Беларусьсю і Расеяй вырасла з 75% да 80%.
Сярод рэгіёнаў у аб’ёме тавараабароту наперадзе Маскоўская, Смаленская, Ленінградзкая, Омская вобласьці і Стаўрапольскі край. Асабліва прыкметна павялічыліся закупкі беларускіх масла, сухога малака, мясапрадуктаў, піламатэрыялаў і льновалакна. У імпарце з Расеі на біржы пераважалі мэталы і вырабы зь іх, змазачныя матэрыялы, палімэры, камплектацыя і дэталі абсталяваньня.
На 1 чэрвеня 2026 году на БУТБ былі акрэдытаваныя 5156 рэзыдэнтаў Расеі, што на 240 больш, чым у пачатку году.
Што гэта значыць?
Лічбы паказваюць далейшы рост зацікаўленасьці расейскіх пакупнікоў у беларускіх таварах. Прычынай гэтаму могуць быць украінскія ўдары па расейскіх нафтаперапрацоўчых заводах (НПЗ), якія справакавалі паліўны крызіс у Расеі і на акупаваных ёю тэрыторыях Украіны.
Як паведамляла газэта «Коммерсантъ», апошнім часам продажы беларускага паліва ў Расеі павялічыліся шматкроць.
«Аб’ёмы рэалізацыі беларускага бэнзіну на Пецярбурскай біржы ў траўні вырасьлі ў разы, нягледзячы на заўважную прэмію да ўнутраных цэнаў. На расейскім рынку захоўваецца недахоп прапановы праз сэзонныя і няплянавыя рамонты НПЗ і рост попыту. Аналітыкі лічаць, што імпарт дапаможа лякальна згладзіць недахоп, але не пакрыць усе страчаныя магутнасьці», — паведамляе выданьне.
18 траўня Аляксандар Лукашэнка заявіў, што «нафтаперапрацоўка таксама ўваходзіць у лік кірункаў для актывізацыі супрацы» і што Беларусь гатовая пастаўляць свой бэнзін у Расею.
Форум