Пазьней Слюсар напісаў, што ўзгараньне танкера і аб’ектаў на тэрыторыі порта ліквідавана, уцечкі мазуту не зафіксавана. Растоўскі губэрнатар таксама паведаміў аб пацярпелых мужчыну і жанчыне ў выніку трапленьня ўкраінскага дрона ў прыватны дом у Таганрогу.
Украінскі маніторынгавы тэлеграм-канал Exilenova+ напісаў аб «масіраваным нападзе» на Таганрог, падчас якой, па зьвестках канала, паведамлялася аб выбухах у тым ліку ў раёне авіяцыйнага завода.
Камандуючы Сіламі бесьпілётных сыстэм Узброеных сіл Украіны Робэрт Броўдзі ў сваім тэлеграм-канале напісаў, што ў Таганрозе ў выніку начнога нападу была зьнішчана нафтабаза «Курганнефцепрадукт» і танкер «ценявога флёту». Браўдзі таксама заявіў аб паражэньні пры ўдары па мясцовым ваенным аэрадроме двух супрацьлодкавых самалётаў Ту-142 і апэратыўна-тактычнага ракетнага комплексу «Іскандэр». Расейскі бок аб нападзе на аэрадром не паведамляў.
Броўдзі таксама напісаў аб начным нападзе УСУ на марскі нафтавы тэрмінал у Феадосіі ў акупаваным Расеяй Крыме.
У Краснадарскім краі з прычыны падзеньня абломкаў дрона адбыўся пажар на тэрыторыі перавалачнай нафтабазы ў Армавіры, паведамілі ў мясцовым апэратыўным штабе. Пацярпелых, як адзначаецца, не. Экстранныя службы пазьней зрабілі справаздачу аб ліквідацыі ўзгараньня, якое ўзьнікла на нафтабазе.
У апэратыўным штабе Кубані таксама паведамілі аб адным пацярпелым у горадзе Прыморска-Ахтарск з прычыны падзеньня абломкаў украінскага дрона. У апэраштабе ўдакладнілі, што ў горадзе абломкі былі знойдзены па шасьці адрасах.
Губэрнатар Белгарадзкай вобласьці Расеі Аляксандар Шуваеў заявіў аб 55 атаках УСУ на рэгіён за апошнія суткі. Шуваеў сьцьвярджае, што ўкраінскі бок ужываў, у прыватнасьці, авіяцыю і артылерыю. У выніку атак загінулі тры мірныя жыхары, яшчэ трое пацярпелі.
Форум