4 сакавіка «Белавія» выканала першы эвакуацыйны рэйс з Дубаю, паведамілі БелТА ў авіякампаніі. Самалёт прызямліўся ноччу 4 сакавіка ў Нацыянальным аэрапорце Менск, ён даставіў у Менск пасажыраў з авіябілетамі на 28 лютага.
На Boeing 737-800 прыляцелі 189 пасажыраў. Самалёт прайшоў па маршруце, які абмінаў патэнцыйна небясьпечныя тэрыторыі. Праз далёкі аблёт борт рабіў пасадку ў Актаў (Казахстан) для дазапраўкі.
Эвакуацыйныя рэйсы таксама заплянаваныя на 4 і 5 сакавіка на шырокафюзэляжных самалётах А 330-200. Зь Менску самалёты выправяць без пасажыраў.
Другі рэйс кампаніі «Белавія» В2718 Дубай — Менск вылецеў зь міжнароднага аэрапорту Дубаю 4 сакавіка а 12:06 мясцовага часу і прызямліўся ў Менску а 18-й гадзіне. Палёт праходзіў бясьпечным маршрутам з улікам дзейных абмежаваньняў. На борце Airbus A330-200 прыляцелі 283 пасажыры, у тым ліку двое немаўлят, паведамілі ў кампаніі.
Як казаў раней генэральны дырэктар авіякампаніі «Белавія» Ігар Чаргінец у этэры «Беларусь 1», паводле яго ацэнкі, у ААЭ маглі затрымацца каля 1 тысячы беларусаў.
З Ірану празь мяжу з Азэрбайджанам вывезьлі 117 грамадзян Расеі і сямёх грамадзян Беларусі, паведамілі ў амбасадзе Расеі ў Тэгеране. Раніцай 4 сакавіка яны прыбылі ў аэрапорт «Жукоўскі» на самалёце МНС Расеі.
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
Форум