Зафіксавалі пацэльваньне 18 дронаў па 11 лякацыях. Расейскія войскі атакавалі жылы сэктар і інфраструктуру. Ёсьць загінулыя і параненыя.
Ва Ўкраіне ад абстрэлаў загінулі сама меней пяць чалавек, больш за 10 параненыя
Чатыры чалавекі загінулі і яшчэ два атрымалі раненьні ў выніку расейскага абстрэлу Запароскага раёну. Там цалкам зьнішчаны жылы дом. Целы загінулых даставалі з-пад завалаў. Расейскія войскі нанесьлі 643 удары па 32 паселішчах Запароскай вобласьці. Абласныя ўлады атрымалі 218 паведамленьняў аб пашкоджаньні жыльля, аўтамабіляў і аб’ектаў інфраструктуры.
У Днепрапятроўскай вобласьці адзін чалавек атрымаў раненьні. Расейскія войскі атакавалі Нікапаль і Сінельнікаўскі раён, дзе пацярпелі сельскагаспадарчае прадпрыемства і прыватны дом.
У Херсонскай вобласьці расейцы білі па крытычнай і сацыяльнай інфраструктуры, а таксама па жылых кварталах. У выніку абстрэлаў пашкоджаныя тры шматпавярховыя дамы і 11 прыватных, воданапорная вежа, вышка сотавай сувязі, газаправод, гаспадарчая пабудова і асабістыя аўтамабілі. Адзін чалавек загінуў, 11 атрымалі раненьні.
Украінскія сілы атакавалі Смаленскую вобласьць
Украінскія і расейскія маніторынгавыя каналы паведамілі, што ў ноч на 25 лютага сілы абароны Ўкраіны атакавалі расейскі хімічны завод у горадзе Дарагабуж Смаленскай вобласьці.
Паводле Расейскай службы Радыё Свабода, некаторыя з Telegram-каналаў, у прыватнасьці Mash, напісалі, што ў выніку атакі загінулі чатыры чалавекі, тры зь іх — супрацоўнікі Міністэрства надзвычайных сытуацыяў Расеі. Яшчэ чатыры чалавекі нібыта атрымалі раненьні.
Паводле Міністэрства абароны Расеі, у ноч на 25 лютага над Смаленскай вобласьцю зьбілі 14 бесьпілётнікаў.
Украінскія крыніцы, у тым ліку Exilenova+ і Supernova+, апублікавалі фота і відэа зь месца лучаньня, якія сапраўды пацьвярджаюць, што цэльлю быў хімічны завод «Дарагабуж» — на ім вырабляюць мінэральныя ўгнаеньні, а таксама аміячную салетру для вытворчасьці снарадаў.
Вайскоўцы Ўкраіны таксама пакуль не камэнтуюць гэтую інфармацыю.
Telegram-канал ASTRA зьвярнуў вагу, што ў мясцовых чатах зьявілася паведамленьне аб скасаваньні заняткаў ува ўсіх школах Дарагабужа.
Пазьней Сьледчы камітэт Расеі паведаміў, што ў выніку абстрэлу загінулі 7 чалавек і ня менш за 10 чалавек атрымалі раненьні. Пашкоджаньні атрымала інфраструктура прадпрыемства і пажарная частка. Паводле гэтага факту завялі крымінальную справу аб тэрарыстычным акце.
Згодна зь інфармацыяй Сьледчага камітэту Расеі, украінскія сілы атакавалі завод 30 ударнымі дронамі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум