Улады назвалі суму аднаўленьня Чырвонага касьцёлу і пералічылі іншыя аб’екты ў Менску, якія чакае рэканструкцыя ці рэстаўрацыя

Касьцёл адчыніць дзьверы для парафіянаў у 2027 годзе, адзначае дзяржаўнае агенцтва «Минск-новости».

Новы комплекс у Пішчалаўскім замку, дзе была турма «Валадарка», адкрыецца пазьней, бо маштаб работаў там большы. На будаўніцтва шматфункцыянальнага комплексу сёлета вылучылі каля 69 мільёнаў рублёў. Яго адкрыцьцё адбудзецца ў 2028 годзе, а ўся рэканструкцыя будзе каштаваць больш за 80 мільёнаў.

У 2027 годзе плянуецца завяршыць рэстаўрацыю адзінага комплексу будынкаў Нацыянальнага мастацкага музэю Беларусі. Гэты праект будаўніцтва доўжыцца ўжо 12 гадоў. На заканчэньне рэстаўрацыі плянуецца выдаткаваць больш за 123 мільёна рублёў.

Прыкладна ў той жа час будзе завершана рэканструкцыя апошніх будынкаў ансамблю Лошыцкага маёнтку і парку. Гэта млын, а таксама сямейная капліца і склеп Прушынскіх. На гэта будзе выдаткавана сёлета 11,6 мільёна, а агулам — 16,6.

ГЛЯДЗІЦЕ ТАКСАМА:

У Беларусі прынялі дзяржаўную праграму «Культурная прастора» і назвалі завяршэньне тэрмінаў рэстаўрацыі вядомых музэяў і замкаў

На працягу наступных 11 месяцаў будуць адрэстаўраваныя царква Ўзвышэньня Сьвятога Крыжа, шэсьць пахавальных капліцаў і цэнтральная ўваходная брама на Кальварыйскіх могілках.

Таксама будуць завершаныя работы ў загсе на вул. Камуністычнай, 8. Распрацоўнікі праекту абяцаюць захаваць гістарычныя інтэр’еры, адначасова дадаўшы патрэбныя сучасныя выгоды, такія як доступ для людзей з абмежаванымі магчымасьцямі.

Амаль 70 мільёнаў рублёў зь мясцовага бюджэту сёлета будуць вылучаныя на рэканструкцыю будынку пад адрасам Партызанскі праспэкт, 154а. Пасьля ўводу ў эксплюатацыю ў 2027 годзе сюды пераедзе дзяржаўны архіў Менску.

Агулам на дзяржаўную праграму разьвіцьця культуры Беларусі да 2030 году плянуецца вылучыць 2,29 мільярда рублёў. Зь іх на рэканструкцыю і будаўніцтва пойдзе каля 1,1 мільярда. І вось на якія аб’екты:

1. Шматфункцыянальны культурны цэнтар у Берасьці (вул. Фаміна) — 201,1 млн руб.
2. Нацыянальны гістарычны музэй Беларусі (раён Арлоўскай вуліцы, Менск) — 190,8 млн руб.
3. Нацыянальны мастацкі музэй — 163,1 млн руб.
4. Дзяржаўны архіў Менску (Партызанскі праспэкт, 154А) — 84,2 млн руб.
5. Архітэктурны комплекс «Замак Пішчалы» (Менск) — 80,5 млн руб.
6. Кінатэатар «Чырвоная Зорка» (Магілёў) — 57 млн руб.
7. Палацава-паркавы ансамбль у Жылічах — 34,1 млн руб.
8. Касьцёл Божага Цела (Нясьвіж) — 33,9 млн руб.
9. Палацавы комплекс у Ружанах — 23,2 млн руб.
10. Палац мастацтваў у Бабруйску — 19,9 млн руб.
11. Лошыцкі архітэктурна-паркавы комплекс (капліца і млын) — 16,6 млн руб.
12. Беларускі дзяржаўны акадэмічны музычны тэатар — 16,1 млн руб.
13. Наваградзкі замак — 13,1 млн руб.
14. Занальны дзяржаўны архіў у Бабруйску — 12 млн руб.
15. Чырвоны касьцёл (Менск) — 11 млн руб.
16. Комплекс былога калегіюму езуітаў (Юравічы): 10,8 млн руб.
17. Культурна-адукацыйны цэнтар у Мсьціславе: 9,1 млн руб.
18. Кінатэатар «Сучасьнік» у Ігумене (Чэрвень): 8,5 млн руб.
19. Будынак у гістарычным цэнтры Менску (Рэвалюцыйная, 24а): 7,3 млн руб.
20. Дзіцячы парк у Воршы: 7,1 млн руб.
21. Віцебскі гарадзкі архіў (рэканструкцыя): 6,5 млн руб.
22. Сядзібны дом графа Патоцкага (Бярэзань): 6 млн руб.
23. Бортнікаўскі сельскі дом культуры (Бабруйскі раён): 5 млн руб.
24. Царква, шэсьць пахавальных капліцаў і ўваходная брама на Кальварыйскіх могілках: 4,7 млн руб.
25. Руіны кляштара бэрнардынак (Берасьцейская крэпасьць): 4,6 млн руб.
26. Палац грамадзянскіх абрадаў (Менск, Камуністычная вуліца, 8): 4,6 млн руб.
27. Адзін з будынкаў палаца Тышкевічаў у Валожыне (плошча Свабоды, 4): 4,4 млн руб.
28. Раённы музэй у Прапойску (Слаўгарад): 2,7 млн руб.
29. Сафійскі сабор — 2,4 млн руб.
30. Памятны знак гісторыі Менску — 1,5 млн руб.

Адсартавана ад даражэйшых да таньнейшых, аб’екты зь фінансаваньнем да мільёна рублёў ня ўключаныя.

ГЛЯДЗІЦЕ ТАКСАМА:

Былы пробашч закрытага ўладамі Чырвонага касьцёла Ўладзіслаў Завальнюк пачаў службу ў Барысаве