У камэнтары, апублікаваным 22 лістапада неафіцыйным тэлеграм-каналам прэс-службы палітыка, Эйсмант паведаміла, што два каталіцкія сьвятары, асуджаныя, паводле яе сьцьвярджэньня, за «зьдзяйсьненьне цяжкіх і асабліва цяжкіх злачынстваў супраць дзяржавы, а таксама іншыя злачынствы», былі памілаваныя 20 лістапада.
Лукашэнка, паводле яе слоў, пайшоў на такі крок «у рамках жэсту добрай волі, кіруючыся прынцыпамі міласэрнасьці і гуманізму, улічваючы стан здароўя асуджаных, а таксама ў мэтах разьвіцьця адносін Рэспублікі Беларусь са Сьвятым пасадам».
- Аб вызваленьні Акалатовіча і Юхневіча стала вядома 20 лістапада з паведамленьня прэс-службы Канфэрэнцыі каталіцкіх біскупаў Беларусі (ККББ). З яго вынікала, што гэтаму паспрыяў нядаўні візыт прэфэкта дыкастэрыі па справах усходніх цэркваў, былога апостальскага нунцыя ў Беларусі кардынала Клаўдыё Гуджэроцьці і яго сустрэча з Лукашэнкам. Цяпер вызваленыя сьвятары знаходзяцца ў Ватыкане.
- Пробашч каталіцкай парафіі Маці Божай Фацімскай у Шуміліне (Віцебская вобласьць), кіраўнік місіі ордэна аблатаў у Беларусі Анджэй Юхневіч знаходзіўся ў няволі з 8 траўня 2024 года. 30 красавіка 2025 г. сьвятар быў прысуджаны да 13 гадоў пазбаўленьня волі. З раскладу суда вынікала, што яго абвінавацілі па трох крымінальных артыкулах, «якія датычацца палавых адносін з непаўналетнімі».
- Вернікам удалося даведацца, што Юхневіч «цалкам адмаўляў абвінавачаньні і спрабаваў даказаць сваю невінаватасьць». Па іх жа інфармацыі, абвінавачаньне будавалася на паказаньнях адной ці некалькіх «ахвяр», якія, магчыма, сьведчылі пад ціскам. Па зьвестках, якія дайшлі да вернікаў, у справе сьвятара гаворка ідзе пра падзеі прыкладна 10-гадовай даўніны.
- Настаяцеля парафіі Сьвятога Юзафа ў Валожыне (Менская вобласьць) Генрыха Акалатовіча затрымалі ў сярэдзіне лістапада 2023 года. У сьнежні 2024-га ён быў прысуджаны да 11 гадоў зьняволеньня за «здраду дзяржаве».
- Сьвятра, паводле яго ж слоў, абвінавацілі ў «шпіянажы на карысьць Польшчы і Ватыкана». Акалатовіч назваў абвінавачаньне «грубай правакацыяй», падкрэсьліў, што ніколі не быў нічыім шпіёнам, назваў працэс судом у дачыненьні да ўсяго каталіцкага касьцёла ў Беларусі.
- Па дадзеных праваабаронцаў, якія прызналі абодвух сьвятароў палітвязьнямі, Акалатовіч мае праблемы са здароўем. Раней ён перанёс інфаркт, пакутаваў ад анкалягічнага захворваньня.
Форум