У доўгі сьпіс «Чырвонага верасу-2026» увайшлі 60 ігравых, дакумэнтальных і анімацыйных фільмаў. Сёньня Беларуская прэмія кінакрытыкаў абвясьціла хто будзе змагацца за перамогу ў трэцяй эдыцыі.
Сярод прэтэндэнтаў — імёны вядомых беларускіх рэжысэраў: Андрэя Куцілы, Мары Тамковіч, Андрэя Кашперскага, Мікіты Лаўрэцкага, Юрыя Сямашкі, Арцёма Лобача, Аляксандра Міхалковіча, Ганны Бадзякі, а таксама новых аўтараў.
«Мы атрымалі 74 заяўкі, 60 трапілі ў доўгі сьпіс. Гэта можа быць зьвязана як з тым, што фільмаў у прынцыпе паўстае менш у сувязі зь неспрыяльнымі ўмовамі, так і зь перасьцярогамі фільммэйкераў удзельнічаць у якіх-кольвек ініцыятывах.
Я вельмі ўсьцешаная сёлетнім доўгім сьпісам — ён разнастайны, у ім багата добрых стужак і вядомых, і новых шматабяцальных творцаў, будзе добрая канкурэнцыя», — расказала Свабодзе Ірэна Кацяловіч.
Таксама Ірэна Кацяловіч адзначыла, што ў сёлета сярод намінантаў прэміі зьявіліся новыя імёны.
«Новыя імёны ў доўгім сьпісе ёсьць, і я ўжо ўяўляю, хто б мог атрымаць узнагароду „Адкрыцьцё году“ гэтым разам. На папярэднім „Чырвоным верасе“ „адкрыцьцём“ стаў Юры Сямашка. Мушу сказаць, што беларускія незалежныя фільмы сапраўды ўражваюць.
Я ўпэўненая, што пры належным чынам наладжаных працэсах і ва ўмовах падтрымкі сваёй краіны беларускае кіно мела б шырокую прадстаўленасьць на міжнародных кінафэстывалях і з посьпехам расказвала б сьвету пра беларусаў. Магчыма, мы гэта яшчэ засьведчым. Пакуль жа „Чырвоны верас“ сапраўды ўзнагароджвае „вераскі“, што прабіліся праз цэглу», — кажа адна з заснавальніц прэміі.
У журы прэміі ўвайшлі 20 чалавек: гэта дасьледніцы кіно Альміра Усманава, Саша Разор і Вольга Ісакава, кінааналітык Максім Жбанкоў, фэстывальны арганізатар Ігар Сукманаў, кінакрытыкі Ганна Яфрэменка і Ульяна Рубанава, кінажурналістка Натальля Бабілёнская і сузаснавальнікі прэміі — кінакрытыкі і Тарас Тарналіцкі і Ірэна Кацяловіч. Некаторыя экспэрты ананімныя.
«Беларусь па зразумелых прычынах паволі зьнікае з нашых экранаў. І фільмаў, зьнятых у Беларусі, становіцца ўсё менш», — адзначае Ірэна Кацяловіч.
Прэмію «Чырвоны верас» заснавалі чацьвёра энтузіястаў-кінакрытыкаў у 2021 годзе, калі стала канчаткова зразумела, што беларускае незалежнае кіно існуе ў новай рэчаіснасьці: «неляяльнае» кіно станавілася немагчымым унутры Беларусі.
Назвы ўсіх фільмаў доўгага сьпісу «Чырвонага вераса — 2026» можна паглядзець тут.
Форум