У цырымоніі ўшанаваньня ахвяраў узялі ўдзел і кіраўніцтвы парлямэнту і ўраду, а таксама сваякі загінулых.
«З такім суседам, як Расея, абарона ўласнай годнасьці, свабоды і незалежнасьці — надзвычайна складаная задача, але бяз гэтага ўкраінскі народ не захаваць. І таму так важна, што ўкраінцы не здаюцца, абараняюць прынцыповыя рэчы і дзякуючы сваёй сіле зьмяняюць хаду гісторыі, каб Украіна жыла і разьвівалася», — падкрэсьлілі Ўладзімір і Алена Зяленскія ў сваім супольным допісе ў сацыяльных сетках.
Мэмарыял знаходзіцца на алеі Герояў Нябеснай сотні (колішняя вуліца Інстытуцкая. — РС) у цэнтры Кіева.
Менавіта на гэтай вуліцы ў 2013–2014 гадах ад зброі, якую выкарысталі сілавікі, загінулі шмат удзельнікаў пратэсту.
У масавых акцыях пратэсту дзевяць гадоў таму загінулі ня менш як 114 грамадзян. Ня толькі ў Кіеве, але і на Чаркашчыне, у Запарожжы, на Львоўшчыне.
У Кіеве пасьля сутыкненьняў між удзельнікамі акцыі і сілавікамі па мэдычную дапамогу зьвярнуліся 2 394 чалавекі — столькі выклікаў «хуткай дапамогі» было афіцыйна зарэгістравана. Але і гэтую лічбу нельга лічыць абсалютнай, бо яшчэ больш пацярпелых не зьвярталіся да лекараў, асьцерагаючыся перасьледу. 738 чалавек атрымалі сярэднія й цяжкія траўмы ад куляў, апёкаў і выбухаў: 15 удзельнікаў акцыяў засталіся без аднаго вока, 8 — без канцавін. Беларуса Міхася Жызьнеўскага не змаглі ўратаваць — куля ад паляўнічай зброі трапіла проста ў сэрца. Такія вынікі 94 дзён супрацьстаяньня.
Сёньня ва Ўкраіне ўспамінаюць гэтыя падзеі і ўшаноўваюць памяць палеглых. Масавыя пратэсты пачаліся 21 лістапада 2013 году з акцыі, на якую выйшлі ўкраінскія студэнты, пратэстуючы супраць спыненьня тагачаснаю ўладаю эўраінтэграцыі. Студэнцкая акцыя была нешматлюднаю — ніхто не чакаў, што яна выльецца ў вялікі пратэст па ўсёй Украіне, які завершыцца зьменаю ўлады, анэксіяй Крыму і вайною на Данбасе.
Падчас Рэвалюцыі годнасьці загінулі два беларусы — Міхась Жызьнеўскі і грамадзянін Украіны, этнічны беларус, колішні дэпутат парлямэнту Якаў Зайко (памёр 18 лютага 2014 году ад інфаркту, калі ўцякаў ад бэркутаўцаў на вуліцы Інстытуцкай у Кіеве).
Форум