«Сельскагаспадарчым арганізацыям-уласнікам пустога жыльля пры продажы яго на аўкцыёне будзе дазволена зьніжаць пачатковую цану жылых памяшканьняў пры правядзеньні паўторных таргоў на 50 працэнтаў, наступных — на 80 працэнтаў». Цяпер кожны наступны аўкцыён цана зьніжаецца на 10 працэнтаў ад пачатковай.
«У выпадку, калі аўкцыён па продажы, праведзены з паніжэньнем пачатковай цаны на 80%, не адбыўся, такія жылыя памяшканьні можна будзе прадаваць за адну базавую велічыню», — піша набліжаны да Лукашэнкі тэлеграм-канал. «Пул першага». Яна складае на сёньня 42 рублі.
Праграма «Пяць домікаў на сяле», абвешчаная Лукашэнкам у 2000-я, каб адрадзіць вёску, прывяла да будаўніцтва многіх дамоў у сельскай мясцовасьці, якія так і засталіся пустымі.
У 2004 годзе Лукашэнка прапанаваў пяцігадовую праграму адраджэньня вёскі, а ў 2005 пачаў яе рэалізоўваць.
«Навізна падыходу тут заключаецца ў тым, што знойдзены ключ да комплекснага вырашэньня цэлага блёка праблем: сельскія населеныя пункты будуць пераўтварацца ў добраўпарадкаваныя аграгарадкі. Менавіта яны мусяць стаць актыўнымі праваднікамі новых тэхналёгій і высокіх сацыяльных стандартаў. Вакол іх будзе канцэнтравацца буйнатаварная аграрная вытворчасьць.
А самі аграгарадкі стануць цэнтрамі ўсяго сельскага жыцьця і здабудуць прывабнае аблічча: тут будзе забясьпечана асноўная інфраструктура як у невялікім горадзе нашай краіны — школы, мэдыцынскія ўстановы, клюбы. Важным кампанэнтам Праграмы стане працяг работы па будаўніцтве пяці дамоў у кожным сельскагаспадарчым прадпрыемстве рэспублікі», — пісала прэс-служба Лукашэнкі па выніках аднаго з абмеркаваньняў праграмы ў 2004 годзе.
А ў самы распал такога будаўніцтва, у 2006 годзе, прэс-служба Лукашэнкі пісала:
«У 2005 годзе ў вёсцы плянуецца здаць у эксплуатацыю 9 тыс. жылых дамоў. З іх у першым паўгодзьдзі — 4 тыс». Паведамлялася, што працэс знаходзіўся пад «жорсткім кантролем Лукашэнкі».
Тады ж Аляксандр Лукашэнка наракаў, што дамы ўзводзяцца няякасна, без уліку асаблівасьцей сельскага жыцьця і патрэбнасьцей будучых гаспадароў.
«Сродкі проста транжырацца, чаго нельга дапускаць. Мы пабудуем помнік безгаспадарчасьці, калі будзем ісьці гэтым шляхам», — сказаў ён.
Тады Лукашэнка заўважыў, што замест заплянаваных 18-20 тысяч даляраў ЗША кошт дамоў для вяскоўцаў часта перавышае 30 тысяч. А ў цэлым на праграму адраджэньня вёскі Беларусь выдаткоўвала 1 млрд. даляраў на год.
Але ўжо праз 10 гадоў, у 2015 годзе, афіцыйная газэта «Советская Белоруссия» пісала, што на Горадзеншчыне стаяць пустымі 700 кватэраў і дамоў, пабудаваных па праграме дзяржаўнай падтрымкі. Некаторыя зь іх прыведзеныя ў нездавальняючы стан, а ў іншыя так і не прыехалі жыхары — яны былі пабудаваныя ў месцах, дзе адсутнічаюць элемэнтарныя жыцьцёвыя выгоды.
Форум