Паводле ацэнкі кампаніі «Літоўскія аэрапорты», праз балёны зь Беларусі аэрапорты Вільні і Коўна страцілі больш як 81 тысячу эўра, паведаміў партал Delfi.
Авіякампаніі ж панесьлі стратаў на «сотні тысяч эўра», адзначаецца ў афіцыйнай публікацыі «Літоўскіх аэрапортаў».
Цяпер юрысты кампаніі рыхтуюць матэрыялы для судовага разбору. Прадстаўнікі авіяперавозчыкаў і пастаўшчыкоў наземных паслуг падлічваюць страты. «Літоўскія аэрапорты» поўныя рашучасьці пакараць вінаватых і адсудзіць панесеныя выдаткі.
Дырэктар дэпартамэнту бясьпекі «Літоўскіх аэрапортаў» Відас Кшанас заявіў, што простай і ўскоснай шкоды значна больш.
Бо праз інцыдэнты —
- зьніжаецца прывабнасьць краіны,
- пасажырам даводзіцца плянаваць альтэрнатыўныя спосабы падарожжа ці выбіраць аэрапорты іншых краін,
- меншае давер да літоўскіх аэрапортаў і рэпутацыі краіны,
- кіраваньне нестандартнымі сытуацыямі цягне за сабой дадатковыя выдаткі.
Што папярэднічала
Літва закрыла мяжу 27 кастрычніка пасьля шэрагу інцыдэнтаў, зьвязаных з запускам з тэрыторыі Беларусі дзясяткаў паветраных балёнаў з кантрабанднымі цыгарэтамі. Праз гэта некалькі разоў спыняў дзейнасьць віленскі аэрапорт і адзін раз — ковенскі.
Закрыцьцё мяжы будзе дзейнічаць да 30 лістапада з магчымасьцю падаўжэньня.
Да 27 кастрычніка памежная служба Літвы двойчы цалкам закрывала мяжу зь Беларусьсю на некалькі гадзін уначы.
28 кастрычніка Польшча заявіла, што гатовая адкрыць два памежныя пераходы зь Беларусьсю ў лістападзе. Але 30 кастрычніка пасьля кансультацый зь Літвой перанесла гэты неназваны тэрмін яшчэ на некалькі тыдняў.
Форум