Экспарт чыгункай беларускага бэнзіну ў Расею ў верасьні вырас у чатыры разы ў параўнаньні з папярэднім месяцам, бо Масква зазнае дэфіцыт паліва, выкліканы атакамі Ўкраіны на яе энэргетычную інфраструктуру.
Пра гэта 7 кастрычніка паведамілі агенцтву Reuters крыніцы ў паліўнай галіне.
Апошнімі тыднямі некалькі расейскіх рэгіёнаў увялі нармаваньне і часова замарозілі цэны на паліва праз дэфіцыт папулярных відаў бэнзіну, выкліканы ўдарамі дронаў па нафтаперапрацоўчых заводах.
Каб пакрыць дэфіцыт, Масква абмежавала экспарт свайго бэнзіну й дызэльнага паліва і павялічыла імпарт паліва зь Беларусі.
Паводле крыніц агенцтва, у верасьні пастаўкі бэнзіну чыгункай зь беларускіх нафтаперапрацоўчых заводаў на ўнутраны рынак Расеі вырасьлі да 49 000 тон у дзень, а пастаўкі беларускага дызэльнага паліва ў Расею ў верасьні склалі 33 000 тон у дзень.
У той жа час транзыт бэнзіну зь Беларусі для далейшага экспарту праз расейскія парты ў мінулым месяцы павялічыўся прыкладна на 1% — да 140 000 тон. Ад сакавіка 2021 году Беларусь выкарыстоўвае расейскія парты для пераладаваньня сваіх нафтапрадуктаў паводле пагадненьня аб супрацы, падпісанага паміж Масквой і Менскам.
Аднак, паводле крыніц і разьлікаў Reuters, з студзеня па верасень такія пераладаваньні ў параўнаньні з аналягічным леташнім пэрыядам зьнізіліся амаль на 40% — да 1,17 мільёна тон, бо паменела абʼёмаў перапрацоўкі.
Два нафтаперапрацоўчыя заводы Беларусі — Наваполацкі «Нафтан» і Мазырскі НПЗ — маюць гадавую магутнасьць па 12 мільёнаў тон, але звычайна вырабляюць каля 9 мільёнаў тон у год.
- Зараз амаль 40% магутнасьцяў расейскіх НПЗ прастойваюць, і гэта рэкорд.
- Каля 70% прыпыненьняў зьвязаныя з атакамі ўкраінскіх бесьпілётнікаў, падкрэсьліў прадстаўнік агенцтва.
- У выніку вытворчасьць бэнзіну і дызэльнага паліва ў Расеі скарацілася на 6% у жніўні і яшчэ на 18% у верасьні.
- Віцэ-прэм’ер Расеі Аляксандр Новак прапанаваў нарасьціць у кастрычніку пастаўкі беларускага бэнзіну ў Расею з 45 тыс. да 300 тыс. тон за месяц. Гэта вынікае са звароту Новака да прэмʼер-міністра Расеі Міхаіла Мішусьціна, зь якім азнаёміўся «Коммерсантъ».
- 30 верасьня расейскі ўрад працягнуў часовую забарону экспартаваць бэнзіну. Яна дзейнічае да 31 сьнежня 2025 году для ўсіх экспартэраў.
- Кабінэт міністраў Расеі таксама ўвёў новую забарону на вываз за мяжу дызэльнага й карабельнага паліва і іншых газойляў. Гэты захад дзейнічае да канца году.
Форум