Як адзначаецца ў апублікаванай на Нацыянальным прававым інтэрнэт-партале Беларусі пастанове, да 31 сьнежня 2025 году Міністэрства транспарту і камунікацый Беларусі павінна на бясплатнай аснове прыняць з уласнасьці Interrail Holding 50 адсоткаў акцый вартасьцю 25 тысяч даляраў.
Да канца году кампанію перададуць у «гаспадарчае вядзеньне» Берасьцейскага аддзяленьня Беларускай чыгункі.
У студзені 2023 году ўрад Беларусі ўключыў беларуска-швайцарскае ТАА «ТрансРэйл-БЧ» у пералік юрыдычных асоб, акцыянэрам якіх забаранілі адчужэньне акцый, паколькі яны паходзяць з замежных краін, што чыняць «недружалюбныя дзеяньні датычна да беларускіх юрыдычных асоб». Першапачаткова такі пералік зацьвердзілі 1 ліпеня 2022 году, а потым яго дапоўнілі.
Кампанію «ТрансРэйл-БЧ» зарэгістравалі ў чэрвені 1994 году. Яе заснавальнікамі выступілі Беларуская чыгунка і АТ Interrail Holding (Швайцарыя). Кампанія мае статус афіцыйнага экспэдытара Беларускай чыгункі і займаецца ня толькі перавозкай грузаў, а і іх суправаджэньнем, у тым ліку афармленьнем перавозачных і мытных дакумэнтаў.
Форум