На мяжы Беларусі выезду ў Эўразьвяз чакаюць амаль 3 тысячы легкавых і грузавых аўтамабіляў

У Дзяржаўным памежным камітэце Беларусі паведамілі аб істотным росьце перад выходнымі чаргі легкавых аўтамабіляў на ўезд у краіны Эўразьвязу.

Як вынікае з афіцыйнага сайту ведамства, а 12.00 13 чэрвеня ўезду ў польскі пункт пропуску Тарэспаль зь Берасьця чакалі 1645 легкавых аўтамабіляў і 17 аўтобусаў.

Па 20 аўтамабіляў стаіць перад літоўскімі памежнымі пераходамі Меднікі (Каменны Лог зь беларускага боку) і Салечнікі (Беняконі зь беларускага боку).

Найбольш загружаным памежным пераходам для грузавікоў у Літве застаюцца Салечнікі — 540 аўтамабіляў у чарзе. На выезд у кірунку Меднікаў чакаюць 370 грузавых аўтамабіляў.

Выезду ў Латвію праз пункт пропуску Патэрніекі (Грыгораўшчына зь беларускага боку) чакаюць 280 грузавікоў.

Беларускія памежнікі сьцьвярджаюць, што памежныя пункты Польшчы, Літвы і Латвіі не выконваюць дзённых нормаў афармленьня аўтамабіляў.

ГЛЯДЗІЦЕ ТАКСАМА:

Мытнікі папярэджваюць пра большыя, чым звычайна, чэргі на літоўска-беларускай мяжы

12 чэрвеня беларускія мытнікі папярэдзілі аб магчымых ускладненьнях руху транспарту цераз пункт пропуску Беняконі, дзе наступныя два дні будуць праводзіць фрэзэраваньне асфальтабэтоннага пакрыцьця.

• 8 жніўня 2023 году Літва закрыла пункты пропуску Шумск (зь беларускага боку Лоша) і Цьверач (Відзы), 1 сакавіка 2024-га — Лаварышкі (Катлоўка) і Райгорад (Прывалка). На мяжы зь Беларусьсю працягваюць працаваць два літоўскія памежныя пераходы — у Медніках і Салечніках.
• Пасьля палітычна матываванага выраку журналісту, актывісту Саюзу палякаў Беларусі Анджэю Пачобуту (8 гадоў пазбаўленьня волі) 10 лютага 2023 году Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (зь беларускага боку Бераставіца).
• На гэты момант на беларуска-польскай мяжы дзейнічае толькі адзін пераход для грузавых аўтамабіляў: Казловічы — Кукурыкі, а таксама адзін для легкавога транспарту і аўтобусаў: Берасьце — Тарэспаль. Так, на зімовыя сьвяты чэргі на выезд зь Беларусі праз гэты пункт перавышалі 2500 легкавых аўтамабіляў і 100 аўтобусаў. Польшча цяпер не разглядае адкрыцьця пунктаў пропуску на мяжы зь Беларусьсю з прычыны браку крокаў насустрач у вострых пытаньнях з боку Менску, заявіў у студзені кіраўнік МУС Польшчы Томаш Семоняк.
• 19 верасьня 2023 году з прычыны наплыву нелегальных мігрантаў з боку Беларусі Латвія на нявызначаны тэрмін закрыла пункт пропуску Сіленэ (Урбаны).