Амбасады ЗША атрымалі ад адміністрацыі Дональда Трампа ўказаньне не прызначаць новыя сумоўі для атрыманьня студэнцкіх візаў, бо заяўнікаў хочуць правяраць у сацыяльных сетках, паведаміла выданьне Politico.
Пра гэта ж паведамляе тэлеканал CNN. Абодва выданьні спасылаюцца на дыпляматычную дэпэшу, якую дзяржаўны сакратар ЗША Марка Рубіё разаслаў у амбасады ЗША.
«З гэтага моманту дзеля рыхтаваньня да пашырэньня абавязковай праверкі ў сацыяльных сетках і адбору консульскія аддзелы не павінны прызначаць дадатковы час для запісу на прыём у пытаньнях студэнцкіх ці абменных візаў (F, M і J) да таго часу, пакуль ня будуць выпушчаныя асобныя ўказаньні, якія мы чакаем у бліжэйшыя дні», — гаворыцца ў дакумэнце.
Не ўдакладняецца, на што будзе накіравана праверка сацыяльных сетак патэнцыйных студэнтаў і што яна мае выяўляць. Politico адзначае, што калі адміністрацыя Трампа ажыцьцявіць гэты плян, гэта можа сур’ёзна запаволіць апрацоўку заяваў на студэнцкія візы, а таксама адбіцца на шматлікіх унівэрсытэтах, якія ў значнай ступені залежаць фінансава ад замежных студэнтаў.
Раней адміністрацыя ўжо ўводзіла пэўныя патрабаваньні праверкі сацыяльных сетак, але ў асноўным яны датычылі студэнтаў, якія вяртаюцца ў ЗША і якія маглі ўдзельнічаць у акцыях пратэсту супраць дзеяньняў Ізраілю ў сэктары Газа.
Адміністрацыя таксама робіць захады для ўзмацненьня кантролю за ўнівэрсытэтамі, якія, на яе думку, празьмерна лібэральныя і патураюць праявам антысэмітызму ў сваіх кампусах. Мацней за ўсё сапсаваліся адносіны Белага дому і Гарварду. Адміністрацыя Трампа абвінавачвае ўнівэрсытэт у антысэмітызьме за студэнцкія прапалестынскія акцыі ў 2023–2024 гадах. У Гарвардзе лічаць, што ўлады перавышаюць свае паўнамоцтвы.
Форум