«Тое, чаго Ўладзімір Пуцін не разумее, дык гэта таго, што калі б ня я, з Расеяй ужо даўно адбыліся б сапраўды жудасныя рэчы. І я маю на ўвазе — сапраўды жудасныя. Ён гуляе з агнём!», — напісаў Дональд Трамп у сацыяльнай сетцы Truth Social.
26 траўня пасьля масавых абстрэлаў Украіны з боку Расеі, Трамп назваў Пуціна «вар’ятам»:
«У мяне заўсёды былі вельмі добрыя адносіны з Уладзімірам Пуціным з Расеі, але зь ім нешта здарылася. Ён стаў абсалютна варʼятам! Ён без патрэбы забівае мноства людзей, і я кажу ня толькі пра салдатаў. Ракеты і бесьпілётнікі».
Ён дадаў, што Пуцін хоча атрымаць усю Ўкраіну, аднак нічым добрым для Расеі гэта ня скончыцца.
«Я заўсёды казаў, што ён хоча атрымаць усю Ўкраіну, а не толькі яе частку, і, магчыма, гэта акажацца праўдай, але калі яму гэта ўдасца, гэта прывядзе да краху Расеі», — заявіў прэзыдэнт ЗША 26 траўня.
Прэс-сакратар Пуціна Дзьмітрый Пяскоў, камэнтуючы Трампавы словы, сказаў, што расейскія ўлады «ўдзячныя амэрыканцам і асабіста прэзыдэнту ЗША» за спрыяньне ў перамовах аб Украіне.
«Вядома, адначасова з гэтым гэта вельмі адказны момант, які зьвязаны з эмацыйнай перагрузкай абсалютна ўсіх і з эмацыйнымі рэакцыямі», — сказаў ён, дадаўшы, што Пуцін «прымае тыя рашэньні, якія неабходныя для запэўненьня бясьпекі» Расеі.
The Wall Street Journal з спасылкай на свае крыніцы піша, што прэзыдэнт ЗША можа ўжо на гэтым тыдні ўвесьці санкцыі супраць Расеі. Паводле выданьня, Трамп расчараваны марудным тэмпам перагавораў і працягам баявых дзеяньняў з боку РФ.
Форум