Адпаведны законапраект Савету міністраў вынесьлі на грамадзкае абмеркаваньне. Сярод іншага, улады прапануюць абсталяваць у грамадзкім транспарце відэакамэры.
Пастанова Савету міністраў прадугледжвае наступныя зьмены:
- забясьпечыць сродкамі відэафіксацыі ўвесь аўтамабільны транспарт, які перавозіць пасажыраў унутры краіны, да 1 студзеня 2028 году;
- абсталяваць пасамі бясьпекі месцы для сядзеньня ў аўтобусах да 1 студзеня 2027 году;
- кіроўцу забароняць зьмяняць спосаб аплаты без узгадненьня з пасажырам;
- удакладніць пералік выпадкаў, калі пасажыр мае права адмовіцца плаціць за паездку ў таксі;
- перагляд патрабаваньняў да кіроўцаў што да стажу і браку прыцягненьня да адміністрацыйнай адказнасьці;
- кіроўцам таксі і міжнародных маршрутаў ня трэба будзе праходзіць курсы, каб атрымаць права перавозіць пасажыраў — мяркуецца, што гэта спросьціць доступ да прафэсіі;
- кіроўцаў пасажырскага транспарту вызваляць ад неабходнасьці праходзіць курсы падвышэньня кваліфікацыі, калі ад атрыманьня правоў адпаведнай катэгорыі прайшло менш за 5 гадоў;
- кіроўцы маршрутак з 1 лістапада 2025 году будуць абавязаныя забясьпечыць магчымасьць безнаяўнай аплаты праезду (выключэньне зрабілі для перавозьнікаў, якім можна плаціць праз сэрвіс «Оплати»).
Абмеркаваньне пастановы на «Праўным форуме Беларусі» працягнецца да 5 траўня. Каб выказаць там сваю думку, трэба зарэгістравацца на сайце.
У Беларусі ўсталявалі ўжо каля 60 тысяч «разумных» камэраў відэаназіраньня, якія могуць адсочваць чалавека, распазнаваць твары, чытаць нумарныя знакі аўтамабіляў, заявіў у пачатку сакавіка міністар унутраных справаў Іван Кубракоў. Пасьля выбараў 2020 году сілавікі ў Беларусі актыўна карыстаюцца камэрамі, каб шукаць удзельнікаў пратэстаў.
Форум