Гэта іх чацьвёртая асабістая сустрэча зь лютага 2025 году. Факт перамоваў Пуціна і Ўіткафа пацьвердзіў прэс-сакратар Крамля Дзьмітрый Пяскоў.
Стыў Уіткаф прыляцеў у Маскву ў раніцай 25 красавіка. У Белым доме раней пацьвярджалі, што Ўіткаф павінен адправіцца ў Расею на гэтым тыдні, не называючы дакладную дату. Папярэдняя сустрэча Ўіткафа з Пуціным адбылася два тыдні таму ў Санкт-Пецярбургу.
Перад пачаткам перамоваў Уіткафа заўважалі падчас прагулкі па Арбаце ў суправаджэньні кіраўніка Расейскага фонду прамых інвэстыцыяў Кірыла Дзьмітрыева, піша Расейская служба Радыё Свабода.
Прэзыдэнт ЗША Дональд Трамп заяўляе, што яго адміністрацыя імкнецца да больш хуткага спыненьня агню і заключэньня «пагадненьня» аб міры ва Ўкраіне, і для гэтага вядзе перамовы як з Расеяй, так і з Украінай.
Міністар замежных спраў Расеі Сяргей Лаўроў у інтэрвію амэрыканскай тэлекампаніі CBS, фрагмэнты якога паказалі 24 красавіка, сказаў, што Масква гатовая заключыць пагадненьне аб міры, «але ёсьць некаторыя асобныя пункты, элемэнты гэтага пагадненьня, якія патрабуюць тонкай наладкі». Пра якія менавіта пункты ідзе гаворка, ён не сказаў.
Афіцыйная пазыцыя Масквы на дадзены момант палягае ў тым, што Ўкраіна павінна адмовіцца ад анэксаванага Крыму і яшчэ чатырох абласьцей, а таксама адмовіцца ад уступленьня ў NATO і пайсьці на іншыя саступкі. У той жа час, шэраг заходніх СМІ са спасылкай на крыніцы пісалі, што Расея можа зьмякчыць свае патрабаваньні і ў прыватнасьці пагадзіцца на спыненьне канфлікту па бягучай лініі фронту.
У тым жа інтэрвію Лаўроў назваў Дональда Трампа «магчыма, адзіным лідэрам на Зямлі, які прызнаў неабходнасьць ліквідацыі карэнных прычын» канфлікту ва Ўкраіне. Што менавіта маецца на ўвазе, Лаўроў не патлумачыў. Раней дзяржсакратар ЗША Марка Рубіё заяўляў, што падчас перамоваў з Расеяй адміністрацыі Злучаных Штатаў стала больш зразумелай пазыцыя Расеі.
Прэзыдэнт Украіны Ўладзімір Зяленскі 24 красавіка заявіў, што пасьля сустрэчы ў Лёндане 23 красавіка прадстаўнікоў Украіны, ЗША і шэрагу краін Эўропы быў сфармаваны новы дакумэнт па пытаньні завяршэньня вайны. Гэты дакумэнт ужо перадалі прэзыдэнту ЗША Дональду Трампу. Зяленскі пры гэтым адзначыў, што ў мірным пагадненьні ня можа быць нічога, што супярэчыць Канстытуцыі Ўкраіны, перадае «РБК-Украіна». Гаворка, па ўсім відаць, ідзе перш за ўсё пра тэрытарыяльныя саступкі.
23 красавіка Трамп абвінаваціў кіраўніка ўкраінскай дзяржавы ў перашкодзе перамовам з Расеяй аб заканчэньні вайны. Трамп выказаў незадаволенасьць публічнымі заявамі Зяленскага аб тым, што Кіеў ні пры якіх абставінах не признает Крым часткай Расеі. На думку прэзыдэнта ЗША, такія заявы перашкаджаюць ходу перамоваў. Зьмест распрацаванага Вашынгтонам пляну ўрэгуляваньня канфлікту афіцыйна не раскрывалі.
Пры гэтым CNN са спасылкай на эўрапейскіх чыноўнікаў піша, што ў Эўразьвязе сур’ёзна занепакоеныя магчымым прымусам Украіны да тэрытарыяльных саступак.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум