Беларускі мэталюргічны завод зьменшыў аб’ёмы вытворчасьці: сёньня прадпрыемства працуе на ўзроўні 90% да мінулага году, паведаміў намесьнік генэральнага дырэктара ў тэхнічным разьвіцьці — галоўны інжынэр БМЗ Мікалай Анэлькін на сустрэчы з калектывам аднаго з цэхаў, піша прэс-служба заводу.
«Такі выбар дыктуе нам існая сытуацыя: складанасьці зь лягістычнымі ланцужкамі і цэнаўтварэньне на рынках. Выгодней працаваць зь меншымі абʼёмамі, чым мець рызыку зрабіць страту», — адзначыў Мікалай Анэлькін.
Як паведамляе прэс-служба БМЗ, галоўнымі тэмамі сустрэчы Мікалая Анэлькіна з калектывам сталі «сытуацыя на сусьветным рынку мэталюргіі і праца заводу ў гэтых умовах».
Ён адзначыў, што частка мэталалому паступае на БМЗ зь Беларусі, і гэта «выгадна» заводу, але іншую частку закупляюць у розных рэгіёнах Расеі, што «абыходзіцца даражэй».
«Санкцыі, СВА (так улады Расеі і Беларусі называюць поўнамаштабную вайну Расеі супраць Украіны. — РС), забарона праезду да Балтыйскага мора — усё гэта павялічвае выдаткі на транспартаваньне. Таму мы імкнемся прымаць аптымальныя рашэньні, каб забясьпечыць усімі неабходнымі матэрыяламі, у першую чаргу, сталеплавільную вытворчасьць — яна наўпрост залежыць ад паставак мэталалому. Больш загружаная на сёньня пракатная вытворчасьць, больш складана з загрузкай сталедрацяных цэхаў», — адзначыў ён.
Пры гэтым галоўны інжынэр БМЗ запэўніў, што завод не скарачае сваіх спэцыялістаў, «каб ня страціць у якасьці, калі сытуацыя на сусьветным рынку мэталюргіі зьменіцца ў лепшы для нас бок».
Беларускі мэталюргічны завод у жніўні 2023 году трапіў пад санкцыі Эўразьвязу за сувязі з рэжымам Лукашэнкі і рэпрэсіі супраць грамадзянскай супольнасьці. Прадпрыемства спрабавала аспрэчыць санкцыі, але 19 сакавіка 2025 году суд Эўразьвязу адхіліў пазоў БМЗ.
Паводле зьвестак ініцыятывы былых сілавікоў BelPol, жлобінскі завод БМЗ сярод шэрагу іншых беларускіх прадпрыемстваў удзельнічае ў вытворчасьці снарадаў калібраў 122 і 152 мм, у тым ліку для расейскіх рэактыўных сыстэмаў залпавага агню «Град», якія абстрэльваюць Украіну. Таксама, паводле BelPol, БМЗ «пастаўляе Расеі мэтал, зь якога ў канчатковым выніку вырабляюць ракеты», якія Расея можа ўжываць у вайне супраць Украіны.
- Беларускі мэталюргічны завод трапіў у рэйтынг 50 найбуйнейшых замежных кампаніяў у Расеі паводле выручкі ў 2023 годзе, які вядзе расейская вэрсія часопісу Forbes: завод заняў 26 месца з 94,3 млрд расейскіх рублёў выручкі.
- У траўні 2022 году «Беларускі мэталюргічны завод» трапіў пад санкцыі Ўкраіны, у жніўні — ЭЗ і ЗША. Яны прадугледжваюць, што сродкі БМЗ у Эўропе мусяць быць замарожаныя, ніякія сродкі і эканамічныя рэсурсы ня могуць перадавацца заводу наўпрост ці ўскосна.
- У ліпені 2023 году кіраўніцтва БМЗ заявіла, што прадпрыемства знайшло новыя рынкі, усе ключавыя паказьнікі прадпрыемствы холдынгу выканалі, а за першае паўгодзьдзе 2023 году завод экспартаваў прадукцыі на $ 660,5 млн.
- Журналісты высьветлілі, што БМЗ працягвае гандляваць з Эўропай, абыходзячы санкцыі ЭЗ, празь літоўскія кампаніі Milca Baltija і Eurologistikos bazė.
- У 2024 годзе БМЗ «працаваў рэнтабэльна і завяршыў яго з прыбыткам», заявіў першы намесьнік генэральнага дырэктара прадпрыемства Анатоль Волкаў. Паводле намесьніка генэральнага дырэктара ў замежных эканамічных сувязях Уладзімера Чавуса, летась на БМЗ вырабілі на 2% сталі больш, чым у 2023 годзе, — 2,3 мільёна тон, а тэмп росту выручкі склаў 109,6%.
Раней урад вырашыў, што «Беларусбанку» кампэнсуюць страты ад выдачы экспартнага крэдыту Беларускаму мэталюргічнаму заводу ў Жлобіне (БМЗ), што вынікае з пастановы Савету Міністраў № 330.
У канцы сакавіка 2023 году ўрад Беларусі пастанавіў такой жа схемай кампэнсаваць «Белаграпрамбанку» страты ад выдачы крэдыту БМЗ (2,65 млрд расейскіх рублёў).
Санкцыі супраць Беларусі за падтрымку расейскай вайны ва Ўкраіне
Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.
Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».
26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.
28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.
Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.
У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.
Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.
Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.
5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.
6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».
8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».
Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.
Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.
Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.
Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.
9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.
22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.
28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.
20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.