Інфляцыя ў Беларусі за тры месяцы перасягнула гадавы прагноз, у лідэрах — прадукты харчаваньня

Як перадае Белстат, прырост цэнаў у Беларусі за сакавік 2025 году склаў 0,8%, лідэр росту цэнаў — харчовыя тавары, прырост цэнаў за месяц склаў 1,2%.

Такім чынам, паводле Белстату, інфляцыя за першы сёлетні квартал складае 5,6%, а прырост цэнаў на харчовыя тавары — 6,9%.

Як паведамляецца ў штотыднёвым аглядзе Эўразійскага банку разьвіцьця, «Паскарэньне росту цэнаў зьвязанае як з падвышэньнем цэнаў на сэзонныя тавары, так і з аслабленьнем беларускага рубля да расейскага (асноўны імпарт харчаваньня ідзе з РФ) у апошнія месяцы».

«Чакаем захаваньня інфляцыі на фоне росту ўнутранага попыту, які падтрымліваецца падвышэньнем заробкаў і пашырэньнем крэдытаваньня», — гаворыцца ў штотыднёвым аглядзе.

Адпаведна з прагнозам парамэтраў эканамічнага разьвіцьця Беларусі «мэтавая задача абмежаваньня інфляцыі прадугледжваецца на ўзроўні, не вышэйшым за 5%».

Такім чынам, інфляцыя за першы квартал перасягнула гадавы прагноз ураду і Нацыянальнага банку, яна будзе расьці надалей, прагназуюць эканамісты ЭАБР.

ГЛЯДЗІЦЕ ТАКСАМА:

Урад Беларусі скараціў амаль на траціну пералік тавараў, цэны на якія рэгулюе дзяржава