У Беларускай аўтамабільнай асацыяцыі паведамілі, што ў першым квартале 2025 году прадалі больш за 13 тысяч новых аўтамабіляў, што ў 1,7 раза больш адпаведнага пэрыяду летась.
«Аднак сакавік унёс невялікую карэкцыю — продажы праз дылераў зьнізіліся на 6,9% у параўнаньні зь лютым. Найбольш заўважна запаволіўся попыт на „зялёныя аўтамабілі“ — іх доля зьнізілася ніжэй за 12% у сукупным сакавіцкім продажы легкавых аўтамабіляў», — адзначаецца на сайце арганізацыі.
У асацыяцыі зьвязваюць гэтую сытуацыю зь зьменамі ва ўмовах фінансаваньня, якія часова паўплывалі на актыўнасьць пакупнікоў.
Лідэрамі продажу ў студзені–сакавіку 2025 году сталі маркі Belgee/Geely (з рынкавай часткай 42%) і LADA (з часткай 33%). Агулам на гэтыя брэнды прыпадае 75% продажу новых легкавых аўтамабіляў.
Пасьля пачатку поўнамаштабнага ўварваньня Расеі ва Ўкраіну, у тым ліку зь беларускай тэрыторыі, а таксама ў сувязі з падтрымкай рэжымам Лукашэнкі гэтай вайны больш за паўтары сотні замежных кампаній і сэрвісаў спынілі ці абмежавалі працу ў Беларусі.
Форум