4 красавіка «Настоящее время» паведаміла, што трансьляцыі ў спадарожнікавых сыстэмах Astra і Eutelsat больш не вядуцца пасьля рашэньня ўрадавай агенцыі ЗША, якая кантралюе дзейнасьць RFE/RL і «Голасу Амэрыкі». Пры гэтым «Настоящее время» ўсё яшчэ трансьлюецца ў спадарожнікавай сыстэме Hotbird. USAGM не дае тлумачэньняў свайму рашэньню.
«Настоящее время», якое Міністэрства юстыцыі Расеі прызнала «непажаданай арганізацыяй» у краіне, заявіла, што яго аўдыторыя можа выкарыстоўваць іншыя лічбавыя сродкі для доступу да праграмаў, якія працягваюць выпускацца. Канал арыентаваны на Расею, Украіну, Цэнтральную Азію, Усходнюю Эўропу і іншыя рэгіёны.
Радыё Свабода ахоплівае амаль 50 мільёнаў чалавек у краінах, у тым ліку ў Беларусі, Кітаі, Іране і Расеі, бо імкнецца прадстаўляць незалежныя навіны і інфармацыю ў 23 краінах, на якія вяшчае на 27-мі мовах.
Крок USAGM у спыненьні кантрактаў на спадарожнікавыя трансьляцыі адбыўся праз тры тыдні пасьля таго, як указ, падпісаны прэзыдэнтам ЗША Дональдам Трампам, прадугледжваў скарачэньне сямі агенцый — у тым ліку USAGM — да «максымальнай ступені, якая адпавядае дзейнаму заканадаўству».
Празь некалькі гадзінаў пасьля падпісаньня распараджэньня USAGM заявіла аб спыненьні фінансаваньня Радыё Свабодная Эўропа/Радыё Свабода Кангрэсам на 2025 бюджэтны год, які заканчваецца 30 верасьня. RFE/RL назвала гэты крок незаконным і вядзе судовы працэс супраць USAGM з гэтай прычыны.
25 сакавіка суд ЗША задаволіў просьбу Радыё Свабода аб вынясеньні часовага забароннага загаду (TRO), пастанавіўшы, што USAGM дзейнічаў «самавольна і капрызна», скасоўваючы грант RFE/RL. На наступны дзень USAGM напісала Радыё Свабода паведамленьне, што скасоўвае ранейшую аб’яву, але гэта не ўплывае на паўнамоцтвы USAGM спыніць грант.
RFE/RL 1 красавіка было вымушана адправіць многіх супрацоўнікаў у адпачынак са скарачэньнем аплаты працы. Кампанія заявіла, што працягвае чакаць афіцыйнага пацьверджаньня ад USAGM інфармацыі пра аднаўленьне фінансаваньня.
Абаронцы правоў СМІ назвалі крок па зьнішчэньні USAGM «абуральным», заявіўшы, што гэта прыносіць перамогу аўтарытарным рэжымам ва ўсім сьвеце. Камітэт абароны журналістаў адзначыў, што гэта таксама падвяргае небясьпецы многіх журналістаў, якія працавалі на вяшчальнікі, такія як RFE/RL, бо на радзіме многія зь іх сутыкаюцца з пагрозай турэмнага зьняволеньня праз прафэсійную дзейнасьць.
USAGM — незалежная ўрадавая ўстанова ЗША, якая кантралюе трансьляцыю навінаў і інфармацыі амаль на 50 мовах прыкладна для 361 мільёна чалавек штотыдня. Агульны бюджэтны запыт для USAGM на 2025 фінансавы год склаў 950 мільёнаў даляраў на фінансаваньне ўсіх апэрацый і капіталаўкладаньняў. Гэта ўключае ў сябе такія сродкі масавай інфармацыі, як RFE/RL, Voice of America, Radio Free Asia, Office of Cuba Broadcasting (Radio Marti), Middle East Broadcasting Networks (MBN) і Open Technology Fund.
Форум