3 красавіка ўрад Беларусі апублікаваў пастанову № 713(6), якая ўносіць зьмены ў парадак рэгуляваньня цэнаў на найбольш значныя для насельніцтва тавары. Пералік такіх тавараў зьменшаны з 331 да 211.
Паводле прэс-службы ўраду, зь пераліку выключаныя «тавары няштодзённага попыту альбо прэміюм-клясы». Для вытворцаў тавараў штодзённага попыту вызначылі «гранічную норму рэнтабэльнасьці», якая для пэўнага тавару павінна быць ня большай, чым у мінулыя гады.
Як патлумачылі ў прэс-службе Савету міністраў Беларусі, «асноўны прынцып гранічнай нормы рэнтабэльнасьці — падтрыманьне вытворцаў». Папраўдзе гэта азначае, што вытворца ня можа павысіць цану, каб не пераўзысьці вызначаны для яго ўзровень рэнтабэльнасьці, нават калі на тавар ёсьць попыт і яго можна прадаць даражэй.
«Дакумэнтам таксама замацоўваецца пералік затрат, якія забаронена ўключаць у сабекошт, і вызначаецца адзіная надбаўка не імпартную прадукцыю незалежна ад колькасьці пасярэднікаў у пастаўцы тавара ад мяжы да паліцы», — гаворыцца ў прэс-рэлізе.
Урад такім чынам хоча стрымаць інфляцыю.
Для 211 таварных пазыцыяў апублікаваныя гранічныя надбаўкі імпартэра і гуртавыя і раздробныя гандлёвыя надбаўкі. У пералік уваходзяць мяса, рыба, кансэрвы, малочныя прадукты, напоі, садавіна і гародніна, дзіцячыя тавары, побытавая хімія, адзеньне і абутак. Усе тавары зь мінімальнага спажывецкага кошыка, напрыклад, з касмэтычных сродкаў тут толькі мыла і шампуні, з мэблі — толькі мэбля для кухні, канапы і шафы.
Асноўныя зьмены набываюць сілу пасьля афіцыйнага апублікаваньня пастановы, а нормы, якія датычацца скарачэньня пераліку рэгуляваных тавараў і парадку цэнаўтварэньня на імпартаваныя тавары — з 15 красавіка 2025 году.
- Рэгуляваньне цэнаў ўрад увёў у 2022 годзе, каб стрымаць інфляцыю.
- Дзяржаўнае рэгуляваньне цэнаў прывяло да праблемаў у сыстэме гандлю. Як паведамляе Белстат, у студзені 2025 году рэнтабэльнасьць сыстэмы раздробнага гандлю склала 1,4%. У 2024 годзе ў краіне было 97 стратных арганізацыяў раздробнага гандлю (у 2023 годзе такіх было 88), гэта 14,4% ад іх агульнай колькасьці. Стратаў на адну такую арганізацыю прыпадала 2,8 мільёна рублёў.
- Такім чынам праз замарожваньне цэнаў урадам гандаль у істоце ператварыўся ў беспрыбытковую дзейнасьць. Скарачэньне пераліку тавараў, цэны на якія рэгулююцца, як чакаецца, паскорыць інфляцыю.
- Паводле Белстату, у лютым 2025 году спажывецкія цэны ў Беларусі вырасьлі на 1,3%, а за 2024 год інфляцыя склала 5,2%.
- Да рэгуляваньня цэнаў рэнтабэльнасьць продажаў у беларускім раздробным гандлі складала 3-5%.
- 21 сакавіка 2025 году Міністэрства антыманапольнага рэгуляваньня і гандлю анансавала, што ў Беларусі будзе значна скарочаны пералік тавараў, цэны на якія рэгулюе дзяржава. Цяпер пастановай ураду рэгулююцца цэны на 331 пазыцыю тавараў.
- Падчас нарады 28 сакавіка Аляксандар Лукашэнка, выказваючыся аб прапановах ураду наконт сыстэмы рэгуляваньня цэнаў, паставіў пад сумнеў ідэю новага прэм’ер-міністра Аляксандра Турчына абмежаваць пералік тавараў, цэны на якія рэгулююцца.
- 2 красавіка прэс-служба ўраду Беларусі паведаміла, што падпісаны дакумэнт, які ўносіць чарговыя зьмены ў пастанову № 713 «Аб сыстэме рэгуляваньня цэнаў». Гэтай пастановай уведзеную ў Беларусі сыстэму рэгуляваньня цэнаў скарэктавалі ўжо шосты раз.
Форум