Як паведамляецца, кіраўніком Офісу будзе Віталь Малчанаў — прадстаўнік Сьвятланы Ціханоўскай у Эстоніі і Латвіі.
Падчас адкрыцьця з прамовамі выступілі эстонскія і беларускія палітыкі. Падчас выступу дэмакратычная лідэрка Беларусі Сьвятлана Ціханоўкая падзякавала Міністэрству замежных спраў Эстоніі за падтрымку і нагадала пра гістарычную сувязь паміж Беларусьсю і Эстоніяй, а таксама — пра агульную барацьбу за свабоду і эўрапейскія каштоўнасьці:
«На жаль, эстонцы добра ведаюць, што такое акупацыя. Вы разумееце, што адбываецца сёньня на акупаваных тэрыторыях Украіны, і што адбываецца ў Беларусі — і хто за ўсім гэтым стаіць. Менавіта таму мы — беларусы, эстонцы, украінцы, літоўцы, латышы, грузіны, малдаване — павінны быць разам. Мы павінны зрабіць усё магчымае, каб перашкодзіць Пуціну аднавіць Расейскую імпэрыю — турму народаў.
Сёньня Эстонія дапамагае беларусам і ўкраінцам змагацца з расейскім імпэрыялізмам. Пасьля гвалтоўнага захопу ўлады Лукашэнкам у 2020 годзе Эстонія прыняла сотні беларускіх палітычных уцекачоў... Я ўпэўненая, што адкрыцьцё нашай місіі ў Таліне дасьць практычныя вынікі».
Таксама адбылася цырымонія ўзнагароджаньня Марка Коплімаа — спэцыяльнага прадстаўніка Эстоніі па справах дэмакратычных сілаў Беларусі.
На адкрыцьці прысутнічалі палітыкі і дыпляматы, у тым ліку — міністар замежных спраў Эстоніі Урмас Рэйнсалу, старшыня Талінскай гарадзкой рады Тоомас Круусімягі, генэральны сакратар МЗС Эстоніі Ёнатан Всэвіаў, спэцпасланьнік Эстоніі па Беларусі Марка Коплімаа, прадстаўнікі МЗС Эстоніі Рыйна Кальюранд, Эрыка Эламаа-Оц, Кярт Юхасоо-Лаўрэнс, Дырэктарка офісу Паўночнай Рады Міністраў у Эстоніі Марыя Грацшэў, прадстаўнікі гарадзкога ўраду.
Прысутнічалі і дыпляматы іншых краін: амбасадары Фінляндыі, Ірляндыі, Швэцыі, Нідэрляндаў, Нарвэгіі, Італіі, Малдовы, а таксама дыпляматычныя прадстаўнікі Латвіі, Францыі, ЗША, Румыніі, Канады, Украіны і іншых дзяржаў.
Год назад, 25 сакавіка 2024 году, Офіс дэмакратычных сіл Беларусі быў адкрты ў сталіцы Чэхіі Празе.
Хто такая Сьвятлана Ціханоўская
Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.
- Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
- 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
- Кандыдаткай у прэзыдэнты Ціханоўскую зарэгістравалі 14 ліпеня 2020.
- Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
- Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
- З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
- Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
- 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
- 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
- Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
- Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
- Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
- За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
- Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
- У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
- У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
- Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
- У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
- У лістападзе 2022 Ціханоўская ўпершыню назвала сябе прэзыдэнтам-электам
Форум