Указ Трампа адмяняе фэдэральнае патрабаваньне прэзыдэнта Біла Клінтана, паводле якога агенцтвы і іншыя атрымальнікі фэдэральных сродкаў аказвалі моўную дапамогу асобам, якія не размаўляюць па-ангельску.
Цяперашні ўказ — перамога руху «Толькі ангельская», які змагаецца за абмежаваньне двумоўнай адукацыі ў ЗША і зьмяншэньне іміграцыі, зазначае The New York Times.
У дакумэнце сказана, што прызнаньне ангельскай афіцыйнай мовай «спрыяе адзінству, павышае эфэктыўнасьць дзяржаўнага кіраваньня і пракладае шлях да грамадзянскай актыўнасьці».
Прыхільнікі Трампа вітаюць указ.
«Гэта вялізны крок, — напісаў у сацсетцы кансэрватыўны палітычны актывіст Чарлі Кірк. — У эпоху масавай іміграцыі прызнаньне ангельскай мовай Амэрыкі гаворыць аб нацыянальным адзінстве».
Аднак ва ўказу ёсьць і праціўнікі. Парлямэнцкі прадстаўнік у справах меншасьцяў Гакім Джэфрыс заявіў, што, як і многія распараджэньні Трампа, гэты ўказ неабходна праверыць на адпаведнасьць амэрыканскім законам і Канстытуцыі. Калі будзе выяўленая неадпаведнасьць, указ павінен быць аспрэчаны ў судзе.
Моладзевы гурт United We Dream адзначыў, што за ўсю гісторыю ЗША ў краіне не было афіцыйнай мовы.
«З усёй непавагай гаворым: No gracias [Не, дзякуй — гішп.], — заявіла прэсавая сакратарка гурту Анабэль Мэндоса. — Трамп хоча намаляваць мішэнь на сьпінах чарнаскурых і каляровых імігрантаў і супольнасьцяў, якія маюць зносіны на розных мовах. Мы гэтага не пацярпім».
- Найбольш распаўсюджаная мова ў ЗША, паводле наяўных зьвестак, ангельская, на ёй размаўляюць 245 млн жыхароў краіны. Другая пазыцыя ў гішпанскай мовы, на ёй маюць зносіны 42 мільёны жыхароў. На трэцім месцы па ўжываньні знаходзіцца кітайская мова зь некалькімі сваімі асноўнымі дыялектамі (3,4 мільёна жыхароў).
- Ужо празь некалькі гадзін пасьля інаўгурацыі Трампа 20 студзеня з сайту Белага дому была выдаленая гішпанамоўная вэрсія.
Форум