Эўрапейскі банк рэканструкцыі і разьвіцьця (ЭБРР) прагназуе, што рост ВУП Беларусі ў 2025 складзе 2,5%, гаворыцца ў новай справаздачы «Пэрспэктывы рэгіянальнай эканомікі», апублікаванай 27 лютага. Такі ж прагноз — рост ВУП на 2,5% — экспэрты даюць на 2026 год.
У справаздачы адзначаецца, што рэальны рост ВУП Беларусі ў 2024 годзе, паводле афіцыйнай статыстыкі, дасягнуў 4%.
«Гэта абумоўлена ростам прамысловасьці, будаўніцтва і гандлю ў кантэксьце працяглых намаганьняў па імпартазамяшчэньні і росьце залежнасьці ад расейскай эканомікі. Аднак экспарт тавараў павялічыўся ўсяго на 1,2% на фоне санкцыяў і парушаных гандлёвых шляхоў. Між тым імпарт вырас на 6,1%, што павялічыла гандлёвы дэфіцыт», — гаворыцца ў справаздачы ЭБРР.
У аглядзе таксама адзначаецца, што інфляцыя ў Беларусі зьнізілася да 5,2% да канца 2024 году. Паводле экспэртаў, гэтаму спрыяў «па-ранейшаму актыўны кантроль за цэнамі» з боку дзяржавы.
«Чаканае запаволеньне расейскай эканомікі адлюстроўваецца ў больш нізкім прагназаваным росьце ВУП у Беларусі на 2,5 працэнта ў 2025 і 2026 гадах з высокімі рызыкамі пагаршэньня пэрспэктываў», — гаворыцца ў аглядзе.
Прагноз ЭБРР на 2025-2026 гады не зьмяніўся ў параўнаньні зь папярэднім дакладам, які выйшаў у верасьні 2024 году.
Згодна з асноўнымі прагнознымі парамэтрамі разьвіцьця Беларусі на 2025 год, улады плянуюць дасягнуць росту ВУП да 4,1%.
У студзені 2025 году, паводле афіцыйнай статыстыкі, валавы ўнутраны прадукт Беларусі павялічыўся на 3,7% да аналягічнага пэрыяду 2024 году.
- Згодна з прагнозам Эўразійскага банка разьвіцьця ад 5 сьнежня 2024 году, рост эканомікі Беларусі ў бліжэйшыя гады замарудзіцца. Спэцыялісты ЭАБР лічаць, што па выніках 2025 году ВУП вырасьце на 2,6%, па выніках 2026 году — на 1,9%, 2027-га — на 1,5%.
- Міжнародны валютны фонд у кастрычніцкім дакладзе 2024 году прагназаваў, што ў 2025 годзе рост эканомікі Беларусі складзе 2,3%.
- Сусьветны банк у кастрычніку 2024 году выдаў прагноз, згодна зь якім беларуская эканоміка ў 2025 годзе павінна вырасьці на 1,2%.
- Дасьледчы цэнтар BEROC у лістападзе 2024 году прагназаваў, што тэмпы росту ВУП у Беларусі могуць зьнізіцца з 4,3% сёлета да 1,5–2,5% у 2025 годзе. У студзені 2025 году экспэрты цэнтру казалі, што на працягу 2025 году рост эканомікі «будзе запавольвацца і па выніках складзе 1,5–2%», прагназуе экспэрт.
Форум