Ва Ўкраіне мяркуюць, што цяпер на тэрыторыі Беларусі знаходзіцца крыху больш за 2 тысячы расейскіх вайскоўцаў і што нельга стварыць тут новую ўдарную групоўку праз інтэнсіўнасьць баявых дзеяньняў на фронце.
Як нгапісала ўкраінскае дзяржаўнае агенцтва «Укрінформ», каля 1450 расейскіх вайскоўцаў знаходзяцца ў Баранавічах і Вілейцы на радыётэхнічных вузлах, прыблізна 530 — на аэрадромах у Баранавічах, Мазыры і Зябраўцы.
Згодна са зьвесткамі агенцтва, на тэрыторыі Беларусі знаходзяцца прыкладна 20 вайскоўцаў з 313-й вайсковай пракуратуры гарнізону і з 484-га вайсковага сьледчага аддзелу.
Апроч таго, каля 20 расейцаў знаходзяцца ў Вялікай Гарожы Асіповіцкага раёну і яшчэ прыблізна 100 вагнэраўцаў.
«Пераважна гэта экіпажы сродкаў СПА, сыстэм РЭБ і РЭР, абслуговы пэрсанал і гэтак далей. То бок не баявая група сухапутных войскаў, якая можа быць здольнай выконваць заданьні ў межах агульнавайсковых наступальных апэрацый», — адзначаецца ў матэрыяле.
Паводле выданьня, цяпер з улікам інтэнсіўнасьці баявых дзеяньняў і стратаў Расея ня мае магчымасьці хутка нарасьціць ударны кантынгент у Беларусі. Толькі ў выпадку прыпыненьня агню або зьніжэньня іх інтэнсіўнасьці Расея можа пачаць фармаваць у Беларусі ўдарную групоўку.
Пры такіх умовах Расея ўжо да канца траўня будзе мець дадатковыя 90–120 тысяч вайскоўцаў, а да канца жніўня — 180–240 тысяч. З улікам базавага падрыхтоўчага пэрыяду мабілізаваных першая партыя ў колькасьці 90–120 тысяч будзе ў баявой гатоўнасьці ў чэрвені. Хоць тэхнікай, паводле агенцтва, такую групоўку будзе складана забясьпечыць.
Паводле інфармацыі выданьня, толькі за 2024 год з Расеі ў Беларусь адправілі 216 вагонаў з грузамі вайсковага прызначэньня, у тым ліку з комплексамі СПА, боепрыпасамі і браняванай тэхнікай для сухапутных войскаў.
У матэрыяле таксама адзначаецца, што ўжо цяпер фіксуюцца будаўнічыя работы для расшырэньня вайсковых аб’ектаў пры ўдзеле расейскіх вайскоўцаў, у тым ліку на тэрыторыі 1405-й базы артылерыйскіх боепрыпасаў, в/ч 42707 у вёсцы Вялікая Гарожа Асіповіцкага раёну.
Форум