Пра гэта заявіла лідэрка дэмакратычных сілаў Сьвятлана Ціханоўская падчас дыскусіі на тэму рэпрэсій у рамках Мюнхэнскай канфэрэнцыі па бясьпецы.
«Мы сапраўды ўпарта працуем над вызваленьнем людзей. Але трэба разумець: вызваленьні адбываюцца не праз гуманнасьць [Аляксандра] Лукашэнкі. Гэта адбываецца праз ціск, які ўвесь час аказваецца на рэжым», — цытуе палітыка яе прэс-служба.
Таксама Ціханоўская заявіла, што «скарачэньне фінансаваньня USAID (Агенцтва ЗША па міжнародным разьвіцьці. — „Позірк“.) моцна паўплывала на многія незалежныя СМІ Беларусі» у выгнаньні: «Гэтыя мэдыя апынуліся на мяжы зьнікненьня. Мы павінны разумець, што СМІ — гэта ня тыя праекты, якія можна прыпыніць на нейкі час. Супрацьстаяньне прапагандзе павінна весьціся штодня. Калі незалежныя галасы замаўчаць, іх месца тут жа зойме расейская і беларуская прапаганда».
Таксама Ціханоўская падкрэсьліла, што «толькі справядлівы мір у перамовах па Ўкраіне дасьць магчымасьць Беларусі і многім іншым краінам зьмяніцца да лепшага»: «Гэта таксама дасьць шанец Малдове, Грузіі, Армэніі».
«Калі Ўкраіна не пераможа ў гэтай вайне — гэта ўзмоцніць Пуціна, і нашыя найбліжэйшыя суседзі — Польшча, Літва, Латвія, Эстонія — апынуцца пад самай вялікай пагрозай зьнікненьня», — дадала яна.
- У рамках Мюнхэнскай канфэрэнцыі Ціханоўская бярэ ўдзел у шэрагу мерапрыемстваў. За чатыры гады ўдзелу ў форуме яна ўпершыню выступіць на асноўнай сцэне.
- Палітык удзельнічае ў працы форуму з 2022 года. У мінулым годзе экспэртная ініцыятыва iSANS арганізавала ў межах канфэрэнцыі круглы стол па Беларусі.
- Мюнхэнская канфэрэнцыя па бясьпецы (Münchener Sicherheitskonferenz, Munich Security Conference) — штогадовы міжнародны форум, які праводзіцца ў Мюнхэне (адміністрацыйны цэнтар Баварыі, поўдзень Германіі) з 1963 года.
Форум