Сыстэма зьмяшчае ўсе зьвесткі аб дзяржаўным фінансаваньні, у тым ліку асабістыя зьвесткі мільёнаў амэрыканцаў, якія атрымліваюць дапамогу або страхавыя выплаты. У пастанове суду пазначана, што доступ DOGE да зьвестак грамадзян і кампаній можа нанесьці ім непапраўную шкоду, паведамляе CNN.
У сыстэме зьмяшчаюцца, апроч іншага, зьвесткі аб вяртаньні падаткаў, выплатах па інваліднасьці і аб заробках дзяржаўных службоўцаў.
Судзьдзя Пол Энгельмаер загадаў усім, хто меў доступ да сыстэмы пасьля 20 студзеня гэтага году — гэта значыць з моманту інаўгурацыі новага прэзыдэнта ЗША Дональда Трампа і пачатку працы DOGE — зьнішчыць усе загружаныя з сыстэмы зьвесткі. Гэтае папярэдняе рашэньне. Судовыя слуханьні па справе адбудуцца 14 лютага.
Папярэдняе рашэньне суду стала адказам на пазоў, пададзены генэральнымі пракурорамі 19 амэрыканскіх штатаў. У пазове пракуроры сьцьвярджаюць, што калі DOGE атрымае магчымасьць пераглядаць дзяржаўныя выплаты, гэта можа прывесьці да страты фэдэральнага фінансаваньня ўстаноў аховы здароўя, дзіцячых садкоў і кліматычных ініцыятыў, а таксама павысіць рызыку кампутарнага ўзлому.
Усе 19 штатаў, чые генпракуроры падалі ў суд, традыцыйна зьяўляюцца прыхільнікамі Дэмакратычнай партыі, апазыцыйнай да Рэспубліканскай партыі, да якой належыць цяперашні прэзыдэнт ЗША Дональд Трамп.
Дэпартамэнт дзяржаўнай эфэктыўнасьці, які ўзначальвае мільярдэр Ілан Маск, быў створаны ўказам Трампа і павінен адсочваць залішнія, на думку ведамства, дзяржаўныя выдаткі. Прыхільнікі Дэмакратычнай партыі лічаць, што Маск перавышае свае паўнамоцтвы, а дзейнасьць DOGE можа прывесьці да спыненьня крытычна важных дзяржаўных праграм і масавага звальненьня дзяржаўных службоўцаў.
Сам Ілан Маск напісаў у сваёй сацыяльнай сетцы Х, што DOGE і Міністэрства фінансаў ЗША ўвядуць катэгарызацыю дзяржаўных выплат і будуць патрабаваць пісьмовага абгрунтаваньня кожнай. Рашэньне судзьдзі Энгельмаера ён назваў «вар’яцкім».
Форум