Усе бягучыя заяўкі на атрыманьне чэскага грамадзянства ад расейцаў, старэйшых за 15 гадоў, будуць прыпыненыя да заканчэньня дзеяньня закону Lex Ukrajinа — а ён у новай вэрсіі будзе бестэрміновы. Папраўка не распаўсюджваецца толькі на невялікую колькасьць людзей. Сярод іх — дзеці, малодшыя за 15 гадоў, уцекачы і тыя, хто зрабіў асаблівы ўнёсак у эканоміку або культуру Чэхіі.
Кіраўнік МУС Чэхіі Віт Ракушан раней заявіў, што гэтая прапанова — часовая і выключная мера ў выключны час, як і ў выпадку з украінцамі, якія таксама шмат у якіх адносінах знаходзяцца ў іншых умовах у сувязі з ваенным канфліктам, чым іншыя замежнікі.
«Тут пастаянна пражываюць 25 тысяч расейцаў, а не адзінкі. Яшчэ больш за 13 тысяч расейскіх грамадзян знаходзяцца ў Чэхіі на падставе іншага дазволу на пражываньне. Чэхія, з гэтым не паспрачаесься, даўно падтрымлівае расейскую грамадзянскую супольнасьць. Яна дапамагае тым, хто зазнае перасьлед з боку пуцінскага рэжыму, даючы ім прытулак», — адзначыў ён.
Расейцы, якія жывуць у Чэхіі, амбудсмэн Чэхіі і некаторыя дэпутаты лічаць прыняты закон дыскрымінацыйным.
- Правілы атрыманьня грамадзянства ў Чэхіі — адны з самых строгіх у Эўропе. Для атрыманьня пашпарта замежнікам трэба пражыць ня менш за 10 гадоў у краіне, мінімум пяць зь іх — з дазволам на сталае пражываньне. Таксама трэба ня мець судзімасьцяў, валодаць мовай, даказаць наяўнасьць стабільнага даходу і ведаў з культуры, гісторыі і ўладкаваньня Чэхіі. Кандыдатаў таксама пільна правяраюць Службы бясьпекі Чэхіі і МУС. Выключэньні з гэтых умоваў магчымыя ў асобных выпадках, напрыклад для ўцекачоў, асобаў з чэскімі каранямі або ў выпадку заключэньня шлюбу з грамадзянінам Чэхіі.
Форум