Міністар унутраных спраў Беларусі Іван Кубракоў узяў удзел у пасяджэньні калегіі гарадзкога ўпраўленьня ўнутраных спраў Мінгарвыканкама, на якім абвясьціў аб звальненьні Дзьмітрыя Балабы з пасады камандзіру сталічнага АМАПу.
Як адзначаецца ў паведамленьні МУС Беларусі, калегія пачалася з цырымоніі ўшанаваньня Дзьмітрыя Балабы ў сувязі зь яго прызначэньнем на пасаду старшыні рэспубліканскага дзяржаўна-грамадзкага аб’яднаньня «Беларускае фізкультурна-спартовае таварыства «Дынама», на якую яго выбралі 29 студзеня.
Якія-небудзь іншыя дэталі ў паведамленьні МУС адсутнічаюць.
У той жа час Свабодзе пацьвердзілі ў таварыстве «Дынама», што Дзьмітры Балабу працуе ў іх з 30 студзеня, а з гарадзкой міліцыі яго звольнілі.
Што вядома пра Дзьмітрыя Балабу
Дзьмітрыю Балабу 52 гады. Ён уключаны ў санкцыйныя сьпісы дэмакратычных краін за рэпрэсіі, падаўленьне пратэстаў і адвольныя арышты пасьля выбараў 2020 году.
У кастрычніку 2020 году ў дачыненьні да яго ўвялі санкцыі Эўразьвяз і ЗША, да іх пазьней далучыліся Альбанія, Ісьляндыя, Ліхтэнштэйн, Нарвэгія, Паўночная Македонія, Чарнагорыя і Ўкраіна. Таксама восеньню 2020 году Балабу ўключылі ў свае санкцыйныя сьпісы Канада, Вялікая Брытанія, Швайцарыя.
27 студзеня ўрад Канады паведаміў аб увядзеньні санкцый у дачыненьні да 10 фізычных і 12 юрыдычных асоб Беларусі. Сярод юрыдычных асоб, у дачыненьні да якіх уведзеныя канадзкія санкцыі, — Атрад міліцыі асаблівага прызначэньня (АМАП), сярод фізычных асоб — жонка і дзеці камандзіра АМАП ГУУС Менгарвыканкаму Вольга Маршаловіч, Арцём і Максім Балабы.
Форум