ЦВК: на 12:00 яўка выбарнікаў склала 56,64% — выбары адбыліся
Паводле ЦВК, выбары ўжо адбыліся ў кожнай з абласьцей Беларусі. Лічбы яўкі па абласьцях, агучаныя Цэнтральнай выбарчай камісіяй:
- Гомельская вобласьць — 62,84%
- Берасьцейская вобласьць — 61,34%
- Магілёўская вобласьць — 58,71%
- Горадзенская вобласьць — 54,96%
- Віцебская вобласьць — 54,40%
- Менская вобласьць — 54,27%
- Менск — 51,29%
Лідэры апазыцыі: Мы ня можам перагарнуць старонку, Лукашэнка не прадстаўляе беларускі народ, ён злачынца
Сёньня ў Варшаве лідэры Аб'яднанага пераходнага кабінэту і Каардынацыйнай рады выступілі з заявамі наконт выбарчай кампаніі 2025 году.
«Беларусы ніколі ня выберуць Лукашэнку. Ён злачынца, які захапіў уладу і з дапамогай Пуціна ўтрымлівае 9 мільёнаў беларусаў у закладніках, тысячы знаходзяцца ў турмах за сваю палітычную і грамадзкую пазыцыю. Ён уцягнуў нашую краіну ў вайну, ён здае сувэрэнітэт Расеі і стаў пагрозай для нашых суседзяў. Ён не прадстаўляе беларускі народ», — заявіла старшыня АПК Сьвятлана Ціханоўская.
Пра тое, што Лукашэнка зьяўляецца злачынцам і незаконна ўтрымлівае ўладу, заявілі таксама намесьнік старшыні АПК Павал Латушка і сьпікерка КР Анжаліка Мельнікава. Падрабязьней >>
У Менску і на Гомельшчыне на патрабаваньне ўладаў адключылі інфармацыйныя экраны, — СМІ
На патрабаваньне ўладаў у менскім мэтрапалітэне і шэрагу іншых месцаў сталіцы з 23 студзеня адключаныя інфармацыйныя экраны. Гэта зроблена, каб пазьбегнуць паўтарэньня леташняга ўзлому сыстэмы, паведаміла «Позірку» крыніца, знаёмая з сытуацыяй.
Паводле зьвестак выданьня «Флагшток», указаньне выключыць інфармацыйныя экраны да 27 студзеня дзейнічае як мінімум і на Гомельшчыне — адпаведнае прадпісаньне атрымалі прадпрыемствы Гомельскай вобласьці.
24 лютага 2024 году, у заключны дзень датэрміновага галасаваньня перад «адзіным днём галасаваньня» на парлямэнцкіх і мясцовых выбарах, дзякуючы намаганьням аб’яднаньня былых сілавікоў BelPol на экраны, у тым ліку ў мэтро, у Беларусі вывелі зварот Сьвятланы Ціханоўскай. 50-сэкундны ролік тычыўся галасаваньня і другой гадавіны расейскай агрэсіі супраць Украіны.
Акцыя «Лукашэнку ў шродэр» пачалася ў Вільні
Актывісты ініцыятывы «Дапамога» паставілі на плошчы здрабняльнік паперы і прапанавалі людзям аркушы з выявамі Лукашэнкі, гэтыя аркушы людзі зьнішчаюць у шрэдэры. Акцыі «Лукашэнку ў шрэдэр» заплянаваныя таксама ў Стакгольме і іншых сталіцах краін Эўразьязу.
У цэнтры Вільні на праспэкце Гедзіміна сабраліся дзясяткі людзей, якія пратэстуюць супраць несумленных выбараў прэзыдэнта Беларусі. На віленскім пляцы імя Кудзіркі стаяць некалькі намётаў, сюды прыйшлі прадстаўнікі беларускай дыяспары, уцекачы, людзі з нацыянальнымі бел-чырвона-белымі беларускімі сьцягамі, а таксама сьцягамі Літвы. Больш пра акцыю + ШМАТ ФОТА
У Варшаве пачаўся марш беларусаў, якія пратэстуюць супраць несумленных выбараў
Беларусы разгарнулі вялікі бел-чырвона-белы сьцяг на маршы ў Варшаве даўжынёй ў 250 мэтраў. Падчас маршу гучалі воклічы «Жыве Беларусь», «Верым, можам, пераможам!» і «Свабоду палітвязьням!»
Марш пачаўся на плошчы Трох Крыжоў, шэсьце накіроўваецца на Замкавую плошчу ў самым цэнтры Варшавы, вуліцы па маршруце перакрытыя. Падрабязьней пра акцыю + ШМАТ ФОТА
ЦВК: на 14.00 яўка выбарнікаў склала 66,41%, прагаласавалі 69 беларусаў замежжа
ЦВК сьцвярджае, што на выбарах прагаласавалі ўжо 66,41% выбарнікаў. Паводле ведамства, яўка па абласьцях такая:
- Гомельская вобласьць — 72,92%
- Берасьцейская вобласьць — 72,86%
- Магілёўская вобласьць — 71,89%
- Горадзенская вобласьць — 65,60%
- Віцебская вобласьць — 65,12%
- Менская вобласьць — 63,73%
- Менск — 56,61%
Паводле ЦВК, 69 грамадзян Беларусі, якія жывуць за мяжой, прагаласавалі на выбарах у Беларусі: найбольш — з Расеі, галасавалі таксама беларусы, якія жывуць у Польшчы, Літве, Нямеччыне, ЗША, Францыі, Італіі і інш., паведаміў намесьнік старшыні ЦВК Аляксей Башан.
Лукашэнка прапанаваў удзел беларускіх міратворцаў ва Ўкраіне
На прэс-канфэрэнцыі 26 студзеня ў Менску Аляксандар Лукашэнка заявіў, што беларускія міратворцы «былі б найлепшым варыянтам ва Ўкраіне», але ня толькі ўкраінцы, але і Захад не пагодзіцца з адпраўкай беларускіх міратворцаў ва Ўкраіну, лічыць ён.
«Калі ў імя даверу і справядлівасьці, то, акрамя беларускага войска, у іх нічога няма. Гэта ня значыць, што я пашлю ў якасьці міратворцаў сваё войска туды — 70 тысяч — там іх выстраю. Але дзеля таго, каб было так, як дамовяцца — гэта толькі беларускае (войска. — Рэд.). Іншых няма. Усе астатнія будуць цягнуць або на Захад, або на Ўсход», — заявіў Лукашэнка. Падрабязьней
Лукашэнка пра ўдзел у наступных выбарах: як скажа Качанава, так і будзе
«Я ўжо ў свой час нагаварыў, што апошнія. Я ж не магу сысьці з кляймом, што я некага спужаўся і сышоў. Гэта не ад мяне залежыць, калі ты сапраўдны прэзыдэнт і стаў гэтым прэзыдэнтам — забудзь пра ўсё», — сказаў Лукашэнка на прэс-канфэрэнцыі.
Лукашэнка намякнуў, што ягоны ўдзел у наступных выбарах, як і ў гэтых залежыць ад атачэньня. Некалькі разоў ён казаў, што пайшоў на гэтыя выбары праз тое, што на гэтым настаяла кіраўніца Савету Рэспублікі Натальля Качанава. Таксама ён сказаў, што будзе арыентавацца на ейнае меркаваньне на наступных выбарах.
Усе цытаты Лукашэнкі з прэс-канфэрэнцыі пасьля галасаваньня
ЦВК: зафіксавана 34 спробы зьняць бюлетэнь на фота ці відэа
Напярэдадні выбараў беларускія ўлады забаранілі фатаграфаваць бюлетэні. Сакратарка ЦВК Алена Балдоўская паведаміла, што на сярэдзіну дня зафіксавалі некалькі дзясяткаў такіх спробаў.
«На сярэдзіну дня па рэгіёнах краіны зафіксавана два вынасы бюлетэняў за межы памяшканьня для галасаваньня і 34 выпадкі фота- або відэаздымкі запоўненага бюлетэня», — паведаміла Балдоўская.
Літва: у Беларусі ня выбары, а спроба Лукашэнкі застацца пры ўладзе
«Тое, што адбываецца 26 студзеня ў Беларусі, — гэта ня выбары. Гэта няўдалая спроба Аляксандра Лукашэнкі застацца ва ўладзе пад прыкрыцьцём дэмакратыі. Лукашэнка не зьяўляецца легітымным кіраўніком дзяржавы. Ён ім ня стане нават пасьля нядзельнага «мерапрыемства», — працытавала Кястуціса Будрыса агенцтва ELTA, паведаміла літоўскае выданьне LRT.
Паводле яго, Лукашэнка імкнецца захаваць уладу любымі магчымымі сродкамі, выкарыстоўваючы рэпрэсіі і нават сымбалічныя рэчы. «Жорсткія рэпрэсіі абмяжоўваюць магчымасьці беларускага народу ўдзельнічаць у выбарах і арганізоўваць акцыі пратэсту», — дадаў ён.
У той жа час, літоўскі міністар падкрэсьліў, што Літва будзе падтрымліваць беларускія дэмакратычныя сілы і грамадзянскую супольнасьць, якія намагаюцца забясьпечыць дэмакратычную будучыню сваёй краіны.
Лукашэнка паспрачаўся з журналістам аб колькасьці ўдзельнікаў пратэставых акцый у Беларусі і за мяжой
У адказ на пытаньне францускага журналіста, што рабіць беларусам, якія баяцца, але хочуць вярнуцца дадому, Лукашэнка параіў ім зьвяртацца ў «камісію па вяртаньні». Таксама ён назваў «хлусьнёй», што ў Беларусі ў 2020-ым пратэставалі сотні тысяч чалавек, і назваў лічбу ў 47 тысяч «на піку». Францускі журналіст абверг яго, спаслаўшыся на зьвесткі ААН. Агулам за ўвесь час пратэстаў 2020-2021 гадоў у іх прынялі ўдзел, паводле падлікаў журналістаў, да мільёна чалавек.
Наконт сёньняшняй акцыі ў Варшаве Лукашэнка заявіў, што ў акцыі прымае ўдзел «дзясятак чалавек». Францускі журналіст таксама абверг ягоныя словы. Падрабязьней
МЗС Беларусі параіла міністру замежных спраў Польшчы «ня лезьці носам у чужыя справы»
Радаслаў Сікорскі пракамэнтаваў выбары ў Беларусі. У сацыяльнай сетцы Х ён напісаў: «Сёньня „выбары“ ў Беларусі. Чаканьне, каго аб’явяць пераможцам, невыноснае».
Сарказм польскага міністра не спадабаўся МЗС Беларусі. Пад допісам зьявіўся камэнтар гэтага ведамства: «Спадар міністар, выбары ў Польшчы адбудуцца 18 траўня 2025 году, і толькі гэтыя выбары павінны вас хваляваць. Займіцеся праблемамі сваёй краіны і свайго народу, а „ня суйце нос не ў свае справы“, як толькі што сказаў Лукашэнка».
ЦВК: на выбарах прагаласавалі ўжо 75,49%
Паводле афіцыйных лічбаў, якія падае ЦВК, яўка наступная:
• Магілёўская вобласьць — 83,12%
• Гомельская вобласьць — 80,91%
• Берасьцейская вобласьць — 80,88%
• Менская вобласьць — 76,50%
• Горадзенская вобласьць — 75,18%
• Віцебская вобласьць — 74,31%
• Менск — 62,48%
У Лоеве адзін чалавек прагаласаваў на двух участках
У Лоеве адна і тая ж жанчына трапіла на здымкі, зробленыя ля скрыняў для галасаваньня на розных выбарчых участках.
Публікацыі разьмясьціла выданьне «Лоеўскі край». У подпісах да фота сьцьвярджаецца, што людзі на іх галасуюць на выбарах прэзыдэнта 26 студзеня 2025 году. Падрабязьней
Свабода слова ў выкананьні рэжыму Лукашэнкі
Улады Беларусі запрасілі дзясяткі журналістаў з сусьветных мэдыя асьвятляць пераабраньне Лукашэнкі і нават дазволілі задаваць вострыя пытаньні аўтарытарнаму кіраўніку Беларусі.
Усё гэта адбываецца ў той час, як сотні беларускіх журналістаў і дзясяткі незалежных беларускіх мэдыя, уключна зь Беларускай службай Радыё Свабода, абвешчаныя «экстрэмісцкімі фармаваньнямі» і выціснутыя за мяжу. Незалежная журналістыка як прафэсія крыміналізаваная ў Беларусі, і тысячы беларусаў пацярпелі за спажываньне кантэнту беларускіх незалежных мэдыя ці ангажаваньне зь імі. Паводле Беларускай асацыяцыі журналістаў, 42 прадстаўнікі беларускіх мэдыя знаходзяцца ў турмах рэжыму Лукашэнкі.
Жывы эфір «Настоящего Времени»
Тэлеканал «Настоящее Время» вядзе жывы эфір, прысьвечаны выбарам у Беларусі
У Кіеве праходзіць марш памяці беларускіх ваяроў
У сталіцы Ўкраіны адбываецца шэсьце зь беларускімі нацыянальнымі сьцягамі і транспарантамі ў памяць палеглых за свабоду Ўкраіны беларусаў.
Удзельнікі сабраліся на Міхайлаўскай плошчы, пасьля пайшлі па маршруце, па якім у 2014 годзе праводзілі ў апошні шлях Міхася Жызьнеўскага. Падрабязьней >>
У Вушачы паказалі асартымэнт буфэтаў на выбарчых участках — ад алькаголю да вырабаў рамесьніцтва
«Больш за 50 найменьняў прадукцыі, адмыслова вырабленай да гэтага дня, прапануюць на ўчастках вушацкія каапэратары. Праходзяць дэгустацыі, дзейнічаюць сьвяточныя зьніжкі», — адзначаецца ў паведамленьні выданьня «Патрыёт».
Буфэты ўпрыгожаныя чырвонымі і зяленымі кулькамі. Падрабязьней >>
Улады рапартуюць пра высокую яўку выбарцаў-дэбютантаў
Кіраўнік ЦВК Ігар Карпенка заявіў, што моладзь актыўна галасуе на прэзыдэнцкіх выбарах.
«На 16:00 яўка грамадзян, якія ўпершыню галасуюць, на выбарах склала 79,91%», — паведаміў ён.
Ва Ўкраіне галасаваньне 26 студзеня ў Беларусі назвалі «тэатрам аднаго актору»
«Замест разьвіцьця і стварэньня дэмакратычнай і прававой дзяржавы рэжым Лукашэнкі выбраў шлях збліжэньня зь іншай дыктатурай – Расеяй, што прывяло да поўнай страты Беларусьсю ўсялякай суб’ектнасьці і самастойнасьці. Замест свабодных і дэмакратычных выбараў у Беларусі сёньня пануюць палітычныя рэпрэсіі, прыдушэньне пратэстаў і саўдзел рэжыму ў злачынстве агрэсіі супраць Украіны», – адзначаецца ў заяве групе дэпутатаў Вярхоўнай Рады Ўкраіны.
Форум