Матч стартуе ў Варшаве ў 20:45 па менскім часе. На гэты час у эфіры СТВ заплянаваны сэрыял «Неўскі. Праверка на трываласьць» і дакумэнтальны праект «Назад у СССР».
Пры гэтым канал СТВ паказваў папярэднія матчы менскага «Дынама» ў асноўным раўндзе Лігі канфэрэнцый з «Хартсам» (1:2) і XIK (0:1). Аднак гульню зь «Легіяй» вырашылі не трансьляваць.
На перадматчавай прэс-канфэрэнцыі ў Варшаве трэнэр «Дынама» Вадзім Скрыпчанка сказаў, што задаволены вялікай цікавасьцю да матча, на які на той час прадалі 22 тысячы квіткоў. Ён, аднак, адмовіўся пракамэнтаваць адсутнасьць трансьляцыі матча на дзяржаўнай тэлевізіі. Скрыпчанка таксама адмовіўся камэнтаваць, ці зьвязаны цяперашні ўзровень беларускага футболу з палітычнай сытуацыяй у краіне.
Фанацкая група менскага «Дынама» раней заклікала беларусаў прыйсьці на матч у Варшаве са сьцягамі і іншай сымболікай:
«Гэты матч — найлепшая магчымасьць нагадаць сьвету пра тое, што адбываецца зь Беларусьсю, у Беларусі. Абвяшчаецца агульны збор на гульню. Купляйце квіткі на стадыён (на любы сэктар, на любыя месцы), бярыце як мага больш сьцягоў і атрыбутыкі нашых колераў», — гаварылася ў паведамленьні фанацкага канала «Zrobleny ū Miensku».
