Ва Ўкраіне заявілі аб пашкоджаньні лініі электраперадач, што праходзіць празь Беларусь

У Міністэрстве энэргетыкі Ўкраіны паведамілі, што за апошні дзень на кароткі час адключалася высакавольтная лінія электраперадач (ЛЭП), празь якую энэргію атрымліваюць спажыўцы Кіеўскай вобласьці.

«Меркаванае месца пашкоджаньня — участак, які праходзіць праз тэрыторыю Беларусі. Цяпер лінія працуе», — паведамілі ў Міністэрстве энэргетыкі Ўкраіны.

У той жа час ва Ўкраіне не ўдакладнілі прычын, празь якія высакавольтная лінія адключалася на кароткі час.

Меркавана мова ідзе аб ЛЭП 330 кВ, што праходзіць праз Брагінскі раён Гомельскай вобласьці ў кірунку Кіеўскай вобласьці.

У «Гомельэнэрга» не паведамлялі пра якія-небудзь праблемы і пашкоджаньні на ЛЭП, што знаходзяцца ў памежнай з Украінай тэрыторыі. Летась гэтая лінія некалькі разоў адключалася празь моцныя навальніцы.

Пасьля мэтанакіраванага абстрэлу Расеяй энэргетычных аб'ектаў ва Ўкраіне практычна ва ўсіх рэгіёнах адбываюцца адключэньні электраэнэргіі.

ГЛЯДЗІЦЕ ТАКСАМА:

Расея зноў ударыла па аб’ектах энэргетыкі Ўкраіны — у шасьці абласьцях

ГЛЯДЗІЦЕ ТАКСАМА:

Адключэньне ўкраінскай энэргасыстэмы ад беларускай: якія рызыкі для памежжа і пры чым тут украінскі мільярдэр