Украіне з гэтых сродкаў прадугледжана выдзяленне амаль $61 млрд. Пры галасаваньні па законапраекту было пададзена 311 галасоў «за» і 112 «супраць». Мяркуецца, што Кіеў атрымае зброю і іншае садзеяньне, неабходнае ўкраінскай арміі для адбіцця расейскай агрэсіі.
Пазьней сёньня сябры Палаты прадстаўнікоў ухвалілі дапамогу ў забесьпячэньні бясьпекі Тайваня і саюзьнікам ЗША ў Інда-Ціхаакіянскім рэгіёне. Таксама былі ўхваленыя меры садзеяньня Ізраілю.
У сувязі з прыняцьцем пакета дапамогі для Ўкраіны зазначаецца, што сьпікер Палаты прадстаўнікоў Майк Джонсан раней на гэтым тыдні вырашыў праігнараваць пагрозы адстаўкі з боку некалькіх членаў Рэспубліканскай партыі і паставіць пытаньне на галасаваньне.
Таксама большасьць заканадаўцаў ад дзьвюх вядучых партый раней прагаласавалі на карысьць мер, якія могуць забараніць у краіне прыкладаньне для сацыяльных сетак TikTok, калі кітайская мацярынская кампанія ByteDance не прадасьць яго іншаму ўладальніку на працягу году.
У гэты законапраект уключаныя і іншыя, ня зьвязаныя з TikTok палажэньні, такія як новыя санкцыі супраць Кітаю, Расеі ды Ірану, а таксама магчымасьць продажу замарожаных сувэрэнных расейскіх рэзэрваў і выкарыстаньне выручаных сродкаў у інтарэсах Украіны.
Кіраўнік Белага дому ўжо заклікаў сэнатараў як мага хутчэй адправіць закон яму на подпіс.
Прэзыдэнт Украіны Уладзімір Зяленскі прывітаў вынікі галасаваньня ў Вашынгтоне, падкрэсьліўшы, што яго зыход «выратуе тысячы і тысячы жыцьцяў». «Мы спадзяемся, што законапраекты будуць падтрыманы ў Сэнаце і адпраўлены на стол прэзыдэнту Байдэну. Дзякуй, Амэрыка», — напісаў Зяленскі ў сацсетцы X.
Больш разгорнута Ўладзімір Зяленскі пракамэнтаваў рашэньне ніжняй палаты Канрэсу ЗША ў сваім Тэлеграм-канале:
«Сёньня адбылося галасаваньне Палаты прадстаўнікоў Злучаных Штатаў. Дзякуй кожнаму і кожнай, хто падтрымаў наш пакет: гэтае рашэньне для абароны жыцьця. Дзякуй асабіста сьпікеру Майку Джонсану, усім амэрыканскім сэрцам, якія, як і мы ва Ўкраіне, адчуваюць, што расейскае зло сапраўды не павінна выйграваць. Спадзяюся, што разгляд пакета ў Сэнаце ЗША і накіраваньне прэзыдэнту Байдэну будуць дастаткова хуткімі.
Мы цэнім кожную праяву падтрымкі нашай дзяржавы і незалежнасьці, нашых людзей і жыцьця нашага, якое Расея так хоча закапаць у руінах. Амэрыка зь першых дзён вайны выяўляла сваё лідэрства. Менавіта такое амэрыканскае лідэрства жыцьцёва важнае для таго, каб у сьвеце захаваўся міжнародны парадак, заснаваны на правілах і прадказальнасьці жыцьця для ўсіх народаў. Безумоўна, мы выкарыстоўваем амэрыканскую падтрымку, каб умацаваць абодва нашы народы і наблізіць справядлівае завяршэньне гэтай вайны — вайны, якую Пуцін павінен прайграць».
У пятніцу, 19 красавіка, Палата прадстаўнікоў ЗША падтрымала разгляд пакету законапраектаў аб аказаньні фінансавай дапамогі Ўкраіне, Ізраілю і Тайваню на працэдурным галасаваньні.
- Кангрэс ЗША з восені мінулага году з прычыны рознагалосьсяў паміж дэмакратамі і рэспубліканцамі ня мог ухваліць пакет дапамогі для Ўкраіны. Бюджэт для Кіева ўваходзіў у агульны законапраект на дзясяткі мільярдаў даляраў аб нацыянальнай бясьпецы ЗША. Рэспубліканцы адмаўляліся прыняць яго з прычыны адсутнасьці ў ім мер па ахове межаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
