Глядзіце размову на відэа цалкам
Тут фрагмэнты гутаркі
- Лукашэнка пачаў забіваць сваіх апанэнтаў з 90-х гадоў. Ужо тады было вядома аб стварэньні так званых «эскадронаў сьмерці». Потым стала вядома і аб стварэньні структуры, якая займаецца палітычнымі забойствамі па-за межамі Беларусі.
- Пасьля падзеяў 2020 году мы не аднойчы чулі публічныя выказваньні як з боку самога дыктатара, гэтак і з боку генэральнага пракурора, кіраўніцтва Сьледчага камітэту, сакратарыяту Савету бясьпекі, старшыні КДБ і іншых прадстаўнікоў рэжыму Лукашэнкі, што яны будуць дзейнічаць так, як дзейнічаў НКВД.
- У свой час сам Лукашэнка сказаў мне: «Я цябе задушу ўласнымі рукамі, калі ты здрадзіш мне». Гэта было яшчэ падчас маёй працы міністрам культуры ў 2010 годзе, калі я ўступіўся ў размове зь ім за Ўладзімера Някляева.
- За апошнія гады я асабіста ўвесь час атрымліваю пагрозы, іх было ўжо больш за сто — як публічныя, гэтак і прыватныя. Толькі за апошні месяц было чатыры пагрозы мэйлам на мой пэрсанальны адрас, што людзі, якія займаюцца маёй ліквідацыяй, ужо знаходзяцца ў Варшаве. Але гэта не ўплывае на маю дзейнасьць як палітыка. Я працягваю працаваць і змагацца з гэтым жудасным рэжымам.
- Паўтара года таму на акцыі каля расейскай амбасады ў Варшаве да мяне падышоў чалавек у масцы і сказаў: «А вы не баіцеся хадзіць на такія акцыі? Бо вы павінны разумець, што ў любы момант вам могуць усадзіць нож у сьпіну».
- Тады я падаў заяву ў польскую пракуратуру пра пагрозу забойства. І я рэгулярна перадаю такую інфармацыю ў адпаведныя праваахоўныя органы. Але дэталі расьсьледаваньняў я альбо ня ведаю, альбо абмежаваны канфідэнцыйнасьцю сьледчых дзеяньняў.
- Трэба фільтраваць сваю камунікацыю і разумець, хто вас куды запрашае і зь якой мэтай, ці варта туды ісьці або ехаць. Я гэта ведаю яшчэ з працы амбасадарам і дыпляматам.
- Разумна заўсёды самому адкрываць бутэльку вады і піць з гэтай бутэлькі. У нас тут ёсьць былыя афіцэры, мы маем камунікацыі з былымі афіцэрамі і ў Беларусі, і яны тлумачаць, што самы просты спосаб ліквідаваць палітычнага апанэнта для рэжыму Лукашэнкі — гэта атручваньне.
- Палітычныя зьмены ў Беларусі бязь зьмены рэжыму ў Расеі больш складаныя, але гэта нельга называць нерэалістычным сцэнарам. Нам трэба прасоўваць тэзіс «Мо варта пачаць зь Беларусі».
- Большасьць беларусаў — супраць Лукашэнкі і супраць вайны. Гэта прынцыповая розьніца паміж беларускім і расейскім грамадзтвам. Большасьць расейцаў — за Пуціна і за вайну супраць Украіны, таму нейкіх крытычных зьменаў у Расеі не адбудзецца.
- Калі нехта спрабуе нас пакласьці ў адзін кошык з Расейскай Фэдэрацыяй, ён робіць тое самае, што рабілася на працягу апошніх стагодзьдзяў, каб усе беларускія пытаньні вырашаліся ў Маскве. Хопіць. Мы нацыя, мы народ, мы эўрапейская краіна, мы хочам жыць па эўрапейскіх прынцыпах і стандартах.
«ПіК Свабоды»
«ПіК Свабоды» — гэты штодзённая YouTube-праграма і падкаст, у якой журналісты Свабоды абмяркоўваюць галоўную падзею дня з палітыкамі, грамадзкімі дзеячамі, экспэртамі і аналітыкамі. Вострыя пытаньні і актуальныя камэнтары пра важныя падзеі для Беларусі і беларусаў.
Як глядзець на YouTube
Падпішыцеся на наш YouTube-канал «Свабода Premium», каб не прапусьціць ніводнага выпуску.
Як слухаць падкаст
Калі вам зручней слухаць, а не глядзець, наш праект дасяжны на асноўных падкаст-плятформах. Выберыце тую, якая падыходзіць менавіта вам.
• Наш сайт
• Apple Podcasts
• Spotify
• Soundcloud
• Podcast Republic
Чароўная спасылка — клікнуўшы на яе, вы аўтаматычна трапіце на адну з папулярных плятформаў.
