У Эўропе праісламскія экстрэмісты атакавалі сынагогі ў Вене і Бэрліне, у шэрагу гарадоў кантынэнту радыкальныя пратэстоўцы заклікаюць да нападаў на габрэяў і пасольствы Ізраілю. Трагедыя адбылася і ў Злучаных Штатах.
Кіраўніца сынагогі ў Дэтройце забітая нажом. Мясцовая паліцыя падкрэсьлівае, што матывы забойства Саманты Ўол пакуль невядомыя, яны просяць ФБР аб дапамозе ў расьсьледаваньні, піша The Times of Israel.
Габрэйская фэдэрацыя заяўляе, што «на дадзены момант няма вядомых пагроз».
Жанчыну знайшлі мёртвай з нажавымі раненьнямі каля ейнага дому ў суботу. Мясцовая паліцыя перасьцерагла ад хуткіх высноў наконт матываў забойства.
40-гадовая Саманта Ўол узначальвала сынагогу Айзэка Агрэ ў цэнтры Дэтройту.
«Мы шакаваныя і засмучаныя, даведаўшыся пра нечаканую сьмерць Саманты Ўол, прэзыдэнта нашай рады», — гаворыцца ў паведамленьні сынагогі, якое яна накіравала вернікам.
«На дадзены момант у нас няма дадатковай інфармацыі, але мы падзелімся большай, калі яна стане даступнай».
Начальнік паліцыі Джэймс Уайт заклікаў «усіх захоўваць цярпеньне», пакуль вядзецца расьсьледаваньне, нягледзячы на тое, што ёсьць «шмат пытаньняў без адказу».
Забойства адбылося на фоне эскаляцыі напружанасьці ў габрэйскіх і мусульманскіх суполках па ўсёй тэрыторыі Злучаных Штатаў з-за вайны паміж Ізраілем і ХАМАС, выкліканай крывавай атакай тэрарыстычнай групоўкі, якая кіруе Газай, на поўдні Ізраілю 7 кастрычніка і шырокімі пратэстамі супраць ваеннага адказу Ізраілю ў Газе.
Публічны заклік былога лідэра тэрарыстычнай групоўкі ХАМАС да глябальных пратэстаў супраць габрэяў прывёў да таго, што на мінулым тыдні некаторыя габрэйскія ўстановы закрыліся або ўмацаваліся, у тым ліку ў раёне Дэтройту, дзе пражывае адна з найбуйнейшых палестынскіх абшчын у Злучаных Штатах.
Пэрсанал хуткай дапамогі знайшоў Уол мёртвай «са шматлікімі нажавымі раненьнямі на целе», паведаміла паліцыя. Крывавы сьлед прывёў афіцэраў да суседняга дому, «дзе, як мяркуецца, адбылося злачынства».
Юдэйская грамада Дэтройту заклікала вернікаў не рабіць пасьпешлівых высноваў і дачакацца, пакуль паліцыя зьбярэ ўсе неабходныя даказкі і ўсталюе дакладную карціну злачынства.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
