Як нагадвае «Зеркало», Аляксандар Лукашэнка больш як год таму падпісаў указ, які «прыняты ў мэтах зьніжэньня рызыкі ўвозу на тэрыторыю краіны ўзбуджальнікаў небясьпечных інфэкцый і бактэрый».
«Апрацоўваць кузавы аўтамабіляў будуць прэпаратам, які зьнішчае большасьць вірусаў. Прызначэньне — у першую чаргу вэтэрынарнае, для зьмяншэньня рызыкі ўвозу на тэрыторыю краіны ўзбуджальнікаў небясьпечных інфэкцый. Станцыі працуюць ужо ў штатным рэжыме», — паведаміў Onliner.by прадстаўнік ТАА «БелГлобалГарант», якое займаецца рэалізацыяй праекту.
Пад транспартнымі сродкамі маюцца на ўвазе «аўтобусы, легкавыя і грузавыя аўтамабілі, зарэгістраваныя ў Рэспубліцы Беларусь або за яе межамі».
Першыя 15 дзён паслуга па дэзынфэкцыі будзе бясплатнай, а з другой паловы верасьня за яе пачнуць спаганяць плату. Колькі — пакуль невядома.
Для аплаты трэба будзе набыць кантрамарку. Яе можна набыць у аддзяленьнях банкаў і страхавых кампаній у пунктах пропуску, а таксама ў тэрміналах самаабслугоўваньня, у якіх кіроўца атрымае электронную кантрольную марку з QR-кодам.
Правяраць, ці ёсьць у кіроўцаў або ўладальнікаў транспартных сродкаў кантрольныя маркі, у пунктах пропуску будуць памежнікі, а ў кіроўцаў або ўладальнікаў транспартных сродкаў, адносна якіх памежны кантроль ажыцьцяўляецца мытнымі органамі, — мытнікі.
Калі ў кіроўцы ці ўладальніка аўтамабіля ня будзе кантрамаркі, транспартны сродак у Беларусь не прапусьцяць.
У якасьці арганізацыі, якая будзе аказваць платныя паслугі па абавязковай дэзынфэкцыі, вызначана ТАА «БелГлобалГарант». Гэтая фірма належыць бізнэсмэну Сяргею Цяцерыну, якога зьвязвае цеснае сяброўства з Аляксандрам Лукашэнкам.
