Кабінэт міністраў Украіны распрацаваў і перадаў на разгляд Радзе нацыянальнай бясьпекі і абароны прапановы аб увядзеньні санкцый на 50 гадоў у абаронна-прамысловай сфэры.
У прыватнасьці, украінскі ўрад прапанаваў:
- забараніць правядзеньне апэрацый з таварамі і паслугамі ў сфэры міжнародных перадач з рэзыдэнтамі Расеі і Беларусі, у тым ліку тых, да ажыцьцяўленьня якіх залучаюцца рэзыдэнты іншых дзяржаў,
- спыніць выкананьне эканамічных і фінансавых абавязаньняў на карысьць рэзыдэнтаў Расеі і Беларусі,
- забараніць перадачу Беларусі і Расеі тэхналёгій, правоў на аб’екты інтэлектуальнай уласнасьці (вынаходкі, карысныя мадэлі, прамысловыя ўзоры, кампаноўкі паўправадніковых вырабаў, таварныя знакі, геаграфічныя ўказаньні, гатункі расьлін, аб’екты аўтарскага права і сумежных правоў) і афармленьня адпаведных дакумэнтаў (за выключэньнем выпадкаў прадоўжваньня тэрміну дзеяньня дакумэнтаў),
- забараніць рэгістрацыю і акрэдытацыю арганізацый калектыўнага кіраваньня, заснавальнікамі якіх зьяўляюцца рэзыдэнты Расеі і Беларусі,
- спыніць дзеяньне супольных праектаў і прамысловых праграм у сфэры бясьпекі і абароны (вытворчасьць тавараў вайсковага прызначэньня і падвойнага выкарыстаньня), удзельнікамі якіх зьяўляюцца рэзыдэнты Расеі і Беларусі.
- забараніць інвэстыцыі рэзыдэнтаў Расеі і Беларусі ў прадпрыемствы, якія ажыцьцяўляюць вытворчасьць тавараў вайсковага прызначэньня і падвойнага выкарыстаньня.
Якія супольныя вайсковыя праекты мелі Ўкраіна і Беларусь
Пасьля пачатку расейскай агрэсіі супраць Украіны ў 2014 годзе Беларусь актывізавала супрацу з Украінай у сфэры вайскова-прамысловага комплексу.
У прыватнасьці, вядома, што Менск прапаноўваў Украіне некалькі супольных праектаў у вытворчасьці вайсковай тэхнікі ў абмен на ракетную. Ёсьць зьвесткі, што толькі ў 2014 годзе гэтая тэма ўздымалася на перамовах тройчы.
У 2011 годзе быў прадстаўлены супрацьтанкавы ракетны комплекс «Скіф-10», распрацаваны кіеўскім канструктарскім бюро «Прамень» і менскай кампаніяй «Пэленг», а таксама аўтаматызаваны зэнітна-ракетны комплекс Т38 «Штылет».
Галоўнай мэтай супольных беларуска-ўкраінскіх распрацовак быў экспарт у трэція краіны.
Адной з пляцовак з 2012 году быў Аршанскі авіярамонтны завод, які мог ня толькі рамантаваць баявыя верталёты Мі-24, але і ствараць новыя машыны Мі-8МСБ. У той момант больш як 50 адсоткаў ягоных акцыяў належалі запароскаму абʼяднаньню «Мотор-Січ». У 2018 годзе беларускія ўлады нацыяналізавалі Аршанскі авіярамонтны завод, а ў кастрычніку 2022 году Служба бясьпекі Ўкраіны паведаміла пра затрыманьне прэзыдэнта акцыянэрнага таварыства «Мотор Січ» Вячаслава Багуслаева паводле падазрэньня ў калябарацыйнай дзейнасьці і спрыяньні дзяржаве-агрэсарцы.
У чэрвені 2016 году шмат паведамлялася аб транспартаваньні праз украінскую чыгунку шасі беларускай вытворчасьці МЗКТ-6922, прызначаных для зэнітна-ракетных комплексаў. Але так да канца і ня высьветлілася, былі яны прызначаныя менавіта ўкраінскаму ВПК ці ішлі транзытам у іншую краіну.
Кіеўская кампанія «Практыка» ў 2019 годзе прадэманстравала браняваны грузавы аўтамабіль «Козак-012», які ствараўся на базе МАЗ-6317. Ва Ўкраіне на яго ўсталёўвалі браняваную кабіну найвышэйшай клясы абароны, адмысловую здымную плятформу з мультыліфтам, якая дазваляла пры пагрузцы абыходзіцца бяз кранаў.
Спэцыялізаваны бронеаўтамабіль «Варта», які з 2016 году вырабляецца ў сэрыйнай вытворчасьці на прадпрыемстве «Українська бронетехніка» (да 2015 году яно займалася выпускам тары з плястмасы), таксама ствараўся на базе беларускага шасі.
Вайсковая гандлёвая статыстыка традыцыйна закрытая, аднак агульныя паказьнікі вонкавага гандлю Ўкраіны ў той час сьведчылі аб істотным павелічэньні пасьля 2014 году паставак зь Беларусі сродкаў наземнага транспарту (частка якога можа вызначацца як прадукцыя двайнога прызначэньня), электрычных машын, чыгуначных лякаматываў, аптычнага абсталяваньня.
