Меркаваная прычына — надрукаваны паўгода таму зборнік «Вызваленыя і заняволеныя. Польска-беларускае памежжа 1939–1941 гг. у дакумэнтах беларускіх архіваў», які рашэньнем суду Цэнтральнага раёну Менску прызналі «экстрэмісцкім».
Выдавецтва «Зьміцер Колас» часова прыпыняе сваю дзейнасьць. «Шаноўнае спадарства, выдавецтва прыпыняе сваю дзейнасьць да асобнага паведамленьня», – паведаміла выдавецтва ў сацыяльных сетках 5 сакавіка.
Паводле выраку суду ад 6 студзеня, выдавецтву было забаронена распаўсюджваць выданьне. Але мяркуецца, што выдавецтва не пасьпела прыбраць яго з продажу. З гэтай нагоды Зьміцера Коласа выклікалі ў КДБ.
- Выдавецтва «Зьміцер Колас» вядомае кнігамі сусьветнай паэзіі, прозы, драматургіі ў найлепшых беларускіх перакладах. Шырока прызнаньне атрымалася кніжная сэрыя выдавецтва «Паэты плянэты». Зусім нядаўна, 28 лютага, у Менскай абласной бібліятэцы імя Пушкіна прайшла імпрэза з нагоды 100-га выпуску сэрыі.
