Брытанскае Міністэрства абароны заявіла, што за апошнія два тыдні Расея, пэўна, зазнала самы высокі ўзровень страт зь першага тыдня маштабнага ўварваньня ва Ўкраіну, якое адбылося амаль год таму, піша «Голас Амэрыкі».
Назіраньне міністэрства заснавана на дадзеных Украіны аб тым, што за апошні тыдзень з расейскага боку штодня гінулі ў сярэднім 824 чалавекі, што больш як у чатыры разы перавышае сярэдні паказчык за чэрвень і ліпень. У міністэрстве заявілі, што статыстыка грунтуецца на «падобных на дакладныя» ўкраінскіх дадзеных.
Рост расейскіх страт, заявіла міністэрства, «падобна, абумоўлены» некалькімі фактарамі, у тым ліку нястачай падрыхтаванага пэрсаналу, каардынацыі і рэсурсаў на фронце.
У абноўленай інфармацыі выведкі Вялікай Брытаніі, апублікаванай у Twitter, таксама гаворыцца, што ва Ўкраіне працягвае назірацца высокі ўзровень скарачэньня электраэнэргіі. Падчас свайго начнога відэазвароту ў нядзелю прэзыдэнт Украіны Ўладзімір Зяленскі высока ацаніў намаганьні працоўных у аднаўленьні энэргасыстэм, пашкоджаных бесьпілётнікамі і ракетнымі атакамі Расеі 10 лютага.
Зяленскі сказаў, што большасьці людзей не даводзілася сутыкацца зь вялікай колькасьцю адключэньняў у суботу і нядзелю.
«Сам факт, што ... пасьля інтэнсіўнага ракетнага ўдару на гэтым тыдні мы можам правесьці такія мірныя энэргетычныя дні, сьведчыць аб прафэсіяналізьме нашых энэргетыкаў, — сказаў ён. — Трэба разумець: гэта яшчэ не рашучая перамога на энэргетычным фронце. На жаль, могуць быць новыя тэракты з боку Расеі. Могуць быць новыя абмежаваньні, калі будуць далейшыя разбурэньні або рост спажываньня».
Зяленскі заявіў, што плянавыя адключэньні электраэнэргіі зноў адбудуцца, калі працоўны тыдзень пачнецца, паведамляе Reuters.
У Харкаве, другім па велічыні горадзе Ўкраіны, адзін чалавек быў паранены ў выніку падзеньня трох расейскіх ракет С-300 на аб’екты інфраструктуры ўначы, паведаміў кіраўнік адміністрацыі Алег Сінягубаў. Расейскія вайскоўцы заявілі, што пацэліілі ў цэхі па зборцы бранятэхнікі на машынабудаўнічым заводзе імя Малышава.
Украінскія вайскоўцы заявілі, што ў 11 лютага ўвечары яны зьбілі пяць расейскіх бесьпілётнікаў над часткова акупаванымі Запароскай і Данецкай абласьцямі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
