Палёт беларускай касманаўткі перанесены на паўгода, паведаміў гендырэктар дзяржкарпарацыі касьмічнай дзейнасьці «Роскосмос» Юры Барысаў у інтэрвію «РИА Новости».
Паводле яго, гэта зьвязана з падаўжэньнем палёту экіпажа карабля «Саюз МС-22» зь няспраўнай сыстэмай ахаладжэньня.
Першапачаткова палёт беларускай касманаўткі заплянавалі на сакавік 2023-га. Пасьля заявілі, што праз узьніклую няштатную сытуацыю яго могуць перанесьці на восень.
Шэсьць прэтэндэнтак на палёт у космас ад Беларусі прайшлі мэдкамісію — спачатку на радзіме, а затым у Расеі. Усіх іх прызналі прыдатнымі да палёту на Міжнародную касьмічную станцыю.
Адбор праходзяць дзьве бортправадніцы нацыянальнай авіякампаніі «Белавія» Марына Васілеўская і Вікторыя Фідрус, судовы экспэрт Дар’я Міхнюк, акушэр-гінеколяг Вольга Герасімава, дзіцячы хірург Анастасія Лянкова і малодшы навуковы супрацоўнік Інстытуту фізыка-арганічнай хіміі Нацыянальнай акадэміі навук Вольга Махнюк.
Па дадзеных «Роскосмоса», у 2001–2021 гадах расейскія караблі даставілі на МКС 15 непрафэсійных касманаўтаў, якія прайшлі падрыхтоўку.
