«Я проста шчыра жадаю Мэрыем з годнасьцю прайсьці ўсе выпрабаваньні. Я ўпэўнены, што рана ці позна беларускі народ атрымае тую свабоду годнасьці».
«Гісторыя, на жаль, паўтараецца, і паўтараецца ў нэгатыўным кантэксьце. Калісьці нацысты ў Нямеччыне ўжо забаранялі выставы, палілі кніжкі або арыштоўвалі за вальналюбства інтэлектуалаў і мастакоў, якія жылі ў 20–40-х гадах у нямецкім Трэцім райху. Гэтае ж самае рабіў Савецкі Саюз за часы Сталіна і пазьней. Вы памятаеце, што за незаконныя песьні і кніжкі і гэтак далей можна было трапіць у турму. Зараз, на жаль, тыя ж самыя практыкі працягвае выкарыстоўваць суседняя з намі краіна».
«Украіна сёньня ваюе за сваю незалежнасьць, за сваю свабоду і за будучыню ўсёй вольнай Эўропы. Мы сканцэнтраваныя на барацьбе з ворагам, і мы дзейнічаем так, як трэба дзейнічаць для таго, каб перамагчы ворага. У тым ліку мы добра ўсьведамляем, што з тэрыторыі суседняй Беларусі Расея, хоча гэтага беларускі народ ці ня хоча, робіць акты агрэсіі ў дачыненьні да Ўкраіны. Я ня думаю, што цяпер час гаварыць пра маральны бок нашых адносін, бо нам трэба выйграць вайну, а пасьля мы вернемся да пытаньня маральных адносін паміж народамі».
- 28-гадовую сьпявачку Мэрыем Герасіменку затрымалі пасьля канцэрту на тэрасе менскага бару «Банки-бутылки» на вуліцы Зыбіцкай у пачатку жніўня. На канцэрце Мэрыем Гера (творчы псэўданім) сьпявала песьню ўкраінскага гурту «Океан Ельзи» «Обійми».
- Пасьля затрыманьня сьпявачку двойчы асудзілі на 15 дзён паводле адміністрацыйнага артыкула, а затым перазатрымалі ў межах крымінальнай справы паводле арт. 342 Крымінальнага кодэксу (Актыўны ўдзел у групавых дзеяньнях, што груба парушылі грамадзкі парадак).
- 20 студзеня 2023 стала вядома, што Герасіменку асудзілі на тры гады «хатняй хіміі».
- Сьледам за Герасіменкай сілавікі затрымалі і ўладальніка бара «Банки-бутылки» Андрэя Жука разам з жонкай Марыяй. Іх таксама абвінавачваюць паводле ч. 1 арт. 342 КК. Суд над імі прызначаны на 31 студзеня.
