Фэдэральныя органы аховы здароўя ЗША адрэагавалі на новую ўспышку захворваньня на каранавірус у Кітаі. Яны аб’явілі, што ў сувязі з усплёскам усе авіяпасажыры, якія прыбываюць з гэтай краіны, павінны здаць адмоўны вынік тэсту на COVID-19 для ўезду, піша «Голас Амэрыкі».
Абмежаваньне набудзе моц з 5 студзеня і закране ўсіх пасажыраў, акрамя дзяцей, малодшых за 2 гады.
Да ЗША аналягічныя захады адносна тых, хто прыяжджае з Кітая, прынялі Індыя, Італія, Японія і Тайвань.
Абмежаваньні з боку ЗША будуць распаўсюджвацца на ўсіх падарожнікаў з мацерыковага Кітая, Ганконгу і Макао, уключаючы тых, хто едзе транзытам у іншыя краіны.
«Інфармацыя аб геномным сэквэнаваньні, аб варыянтах, што цыркулююць у Кітаі, якая ёсьць у глябальных базах дадзеных, няпоўная. Акрамя таго, зьніжаны ўзровень тэставаньня новых выпадкаў і справаздачнасьці па іх. Праз адсутнасьць дадзеных нам, работнікам органаў аховы здароўя, складана выяўляць новыя варыянты, якія распаўсюджваюцца ў ЗША», — сказаў амэрыканскі фэдэральны чыноўнік падчас канфэрэнц-званку.
Дырэктара Супрацоўніцкага цэнтру САЗ у нацыянальным і глябальным заканадаўстве ў галіне аховы здароўя Лоўрэнс Госьцін лічыць, што дзеяньні ЗША абсалютна апраўданыя.
«У Кітаі адбылося выбуховае распаўсюджваньне COVID-19, што цалкам апраўдвае рэакцыю ЗША», — сказаў ён.
Злучаныя Штаты прапанавалі Кітаю вакцыны і іншыя меры падтрымкі ў барацьбе з COVID-19.
«Пэкін публічна заявіў, што яны ўдзячныя за гэтую прапанову, але ў гэты момант ім не патрэбна дапамога. Але мы не адмаўляемся ад сваёй прапановы», — заявіў другі фэдэральны чыноўнік падчас канфэрэнц-званку з журналістамі. Паводле правілаў такіх канфэрэнцый, імёны чыноўнікаў не раскрываюцца.
Раней у Кітаі прайшлі акцыі пратэсту з патрабаваньнямі зьменшыць абмежавальныя захады, пачатыя ў сувязі з распаўсюджваньнем каранавірусу.
