Украінская ваенная выведка заяўляе, што падобныя інцыдэнты могуць адбыцца на тэрыторыях, якія мяжуюць з краінамі Эўразьвязу і Ўкраінай. Пры гэтым сьцьвярджаецца, што адна з галоўных мэт — Беларуская АЭС у Астравецкім раёне Горадзенскай вобласьці, разьмешчаная непадалёк ад мяжы з Літвой.
«Распрацоўкай і рэалізацыяй „праекта“ займаюцца расейскія спэцслужбы, — гаворыцца ў паведамленьні ГУВ Мінабароны. — У той жа час беларускі КДБ проста пастаўлены ў вядомасьць. Адказнымі за тэракты традыцыйна прызначаць грамадзян краін NATO і Ўкраіны, якія будуць пераапранутыя ў беларускую ваенную форму. Цяпер падразьдзяленьні беларускіх КДБ, МУС і пагранічных войскаў ужо прыведзены ў стан павышанай баявой гатоўнасьці».
«На думку распрацоўшчыкаў „праекта“, усё гэта павінна паскорыць уцягваньне беларускай арміі ў вайну ва Ўкраіне на баку акупантаў. А таксама стварыць неабходную для Крамля грамадзкую думку ў беларускім грамадзтве», — заявілі ва ўкраінскай ваеннай выведцы.
Літва, якая пасьлядоўна крытыкавала будаўніцтва атамнай станцыі пад Астраўцом, перакананая, што БелАЭС небясьпечная, а сам праект зьяўляецца «геапалітычнай зброяй». Беларусь усе прэтэнзіі абвяргае.
- 21 кастрычніка Ўзброеныя сілы Ўкраіны папярэдзілі, што калі беларуская армія «падтрымае расейскую агрэсію», ёй «адкажуць гэтак жа жорстка, як адказваюць усім акупантам на тэрыторыі Ўкраіны з выкарыстаньнем усяго арсэнала ўзбраеньняў, з нанясеньнем удараў па ваенных абʼектах на тэрыторыі Беларусі».
- Лукашэнка неаднаразова заяўляў, што Беларусь удзельнічае ў «спэцыяльнай ваеннай апэрацыі», усяляк падтрымліваючы Расею, але «нікога не забіваючы».
