На афіцыйным сайце шатляндзкага ўраду 14 чэрвеня апублікавалі дакумэнт пад назвай «Здаравей, шчасьлівей, справядлівей: Чаму не Шатляндыя?», у якім прадстаўлены плян рэфармаваньня дзяржавы. У прадмове да дакумэнту Стэрджэн напісала, што цяпер найлепшы час для пабудовы «новай Шатляндыі», «пасьля каранавірусу, Брэксыту і Борыса Джонсана».
Для правядзеньня новага галасаваньня патрабуецца згода брытанскага ўраду. Прэмʼер-міністар Вялікай Брытаніі Борыс Джонсан заявіў, што цяпер не найлепшы час гаварыць пра рэфэрэндум. Раней ён паабяцаў «не дапусьціць адлучэньня Шатляндыі» і заявіў, што пытаньне было вырашанае пасьля першага рэфэрэндуму ў 2014 годзе.
Тады 55% насельніцтва Шатляндыі прагаласавалі супраць незалежнасьці. Рэфэрэндум быў праведзены да выхаду Вялікай Брытаніі з Эўразьвязу. Шатляндзкія нацыяналісты ўпэўненыя, што пасьля Брэксыту вынік быў бы кардынальна іншы.
- Апытаньні грамадзкай думкі паказваюць, што колькасьць прыхільнікаў і праціўнікаў незалежнасьці ў Шатляндыі прыблізна роўная. Аднак толькі траціна жыхароў падтрымлівае ідэю правядзеньня новага рэфэрэндуму, як вынікае з апытаньня, праведзенага ў траўні, паводле паведамленьня газэты The Scotsman.
