Дзяржаўнае спэцыялізаванае прадпрыемства «Екоцентр», якое ажыцьцяўляе радыяцыйны маніторынг у зоне адчужэньня, са спасылкай на зьвесткі сыстэмы NASA FIRMS, паведаміла аб чатырох пажарах, плошча якіх з кожным днём павялічваецца.
У прыватнасьці, пажары зафіксавалі каля ўкраінскіх паселішчаў Палескае, Бабёр, Сьцячанка, а таксама ў раёне населеных пунктаў Рудня-Верасьня Кіеўскай вобласьці, якія знаходзяцца ў 30-кілямэтровай зоне ад мяжы зь Беларусьсю.
Паводле генэральнага дырэктара «Екоцентру» Сяргея Кірыева, за зьвесткамі NASA Firms, пажары ў раёне Сьцячанкі павялічыліся ў памеры да 2 км², а ў раёне паселішча Бабёр — до 10 км².
«Пэўна, узгараньне пачалося ў выніку ўзброенай агрэсіі Расеі, а менавіта ад снарада ці наўмыснага падпалу. Згодна з клясыфікацыйнымі прыкметамі надзвычайных сытуацый, крытэрыі пажараў у зоне адчужэньня не павінны перавышаць аб’ёмы 0,05-0,2 км², але наяўны стан плошчы пажараў перавышае гэтыя паказьнікі ў дзясяткі разоў», — сьцьвярджае дырэктар.
Сяргей Кірыеў падкрэсьліў, што найбольшую пагрозу нясуць цяперашнія пажары на тэрыторыях са значнымі ўзроўнямі забруджваньня і ў месцах разьмяшчэньня інфраструктуры радыяактыўных адкідаў у межах 10-кілямэтровага радыюсу вакол ЧАЭС.
Праз часовую акупацыю аварыйна-ратавальныя службы ня могуць выехаць на тушэньне пажараў.
Пэрсанал ЧАЭС у закладніках 18 дзён
Тым часам 211 супрацоўнікаў захопленай расейцамі Чарнобыльскай АЭС ужо 18 дзён праз забарону ратацыі вымушаны жыць і працаваць на станцыі.
Генэральны дырэктар Міжнароднага агенцтва атамнай энэргетыкі Рафаэль Мар’яна Гросі заявіў, што цяперашняя сытуацыя на абедзьвюх захопленых Расеяй атамных станцыях, у Чарнобылі і Энэргадары, пярэчыць аднаму зь сямі абавязковых прынцыпаў ядзернай бясьпекі.
У размове зь ім генэральны дырэктар «Росатома» Аляксей Ліхачоў пацьвердзіў, што на Чарнобыльскай і Запароскай АЭС знаходзяцца расейскія атамнікі, якія «аказваюць кансультацыйную дапамогу» ўкраінскаму пэрсаналу станцый.
Украінская экспэртка ў пытаньнях энэргетыкі Вольга Кашарна заявіла, што ўкраінскія атамнікі не патрабуюць ніякіх кансультацый з супрацоўнікамі «Росатома».
«Нашы энэргаблёкі прайшлі мадэрнізацыю, якая ня сьнілася „Росатому“! Нашы энэргаблёкі прайшлі стрэс-тэсты пасьля аварыі на Фукусіме паводле мэтадалёгіі Эўразьвязу, у адрозьненьне ад расейскіх. МАГАТЭ і ЭЗ вэрыфікавалі справаздачы аб стрэс-тэстах», — падкрэсьліла экспэртка.
«Гэта нашыя атамнікі могуць кансультаваць расейскіх, а не наадварот», — дадала яна.
У Славуцічы нованароджаных дзяўчатак называюць Вікторыямі
Галоўнай праблемай Чарнобыльскай АЭС і навакольля па-ранейшаму застаецца адсутнасьць электрычнасьці, якая забясьпечвала працу ўсіх сыстэм бясьпекі ядзерных аб’ектаў станцыі, зоны адчужэньня і гораду Славуціча, пабудаванага фактычна для абслугоўваньня Чарнобыльскай АЭС.
Высакавольтная лінія электраперадач пашкоджаная 9 сакавіка пры абстрэле расейскім войскам.
Гарадзкія ўлады Славуціча паведамілі, што горад забясьпечаны цяплом і вадой.
«Чакаем завяршэньня работ „Укренерго“ ў аднаўленьні электразабесьпячэньня ЧАЭС і Славуціча».
Напярэдадні камунальныя службы і валянтэры развозілі па кварталах дровы.
«За час вайны ў горадзе нарадзіліся 13 дзяцей — 11 дзяўчатак і 2 хлопчыкі. Большасьць дзяўчатак бацькі плянуюць назваць Вікторыямі. Перамога за намі. Славуціч пад сьцягам Украіны», — паведамілі ў Славуціцкай гарадзкой радзе.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
